Patriarx Üçüncü Şio: Əgər ailəni qorumasaq, ölkəmizdə başqa xalqlar çoxalıb üstünlük təşkil edə bilər

Bütün Gürcüstanın Katolikos-Patriarxı, Mtsxeta-Tbilisi arxiyepiskopu və Biçvinta ilə Suxumi-Abxaziya mitropoliti Üçüncü Şio demoqrafik problemlər və ailə institutunun qorunması ilə bağlı ciddi xəbərdarlıq edib.

InterPress.ge xəbər verir ki, Üçüncü Şio bu barədə Sameba kafedral məbədində çıxışı zamanı danışıb. Katolikos-Patriarx bildirib ki, əgər cəmiyyət ailənin qorunmasına və möhkəmləndirilməsinə diqqət yetirməsə, Gürcüstan gələcəkdə real demoqrafik təhlükə ilə üzləşə bilər.

“Əgər biz ailənin xilas olunmasına çalışmasaq, bunun qeydinə qalmasaq, bizi real təhlükə gözləyir. Bizim gözəl, cənnət kimi ölkəmizdə bizimlə birlikdə başqa xalqlar möhkəmlənəcək və kök salacaqlar. Onlar uşaqları sevirlər, uşaqları aldırmırlar, öz dinlərini müdafiə edir və qoruyurlar. Buna görə də onlar daha sürətlə artırlar.

Allah qorusun, əgər biz belə davam etsək, bu təhlükə realdır və mümkündür ki, onlar say baxımından çoxalıb gürcülərdən üstün olsunlar. Ona görə də Allah bizə güc versin ki, ailəmizi qorumaq üçün çalışaq və ailə dəyərlərini müdafiə edək”, – deyə Üçüncü Şio bildirib.

Katolikos-Patriarx qeyd edib ki, ailə yalnız şəxsi həyat forması deyil, həm də milli kimliyin və dövlətin əsas dayaqlarından biridir.

Onun sözlərinə görə, ailənin möhkəmliyi cəmiyyətin və dövlətin gələcəyini müəyyənləşdirir, bu səbəbdən ailə institutunun qorunması və demoqrafik vəziyyətin yaxşılaşdırılması xüsusi əhəmiyyət daşıyır.