Mamuka Mdinaradze: Bir tərəf onları vicdan məhbusu, digər tərəf isə cinayətkar adlandırdıqca cəmiyyətdə razılıq mümkün olmayacaq

Gürcüstanın vitse-baş naziri və hüquq-mühafizə orqanlarının koordinasiyası üzrə dövlət naziri Mamuka Mdinaradze bildirib ki, aksiyalar zamanı saxlanılan şəxslərlə bağlı cəmiyyətdə vahid mövqe formalaşmayınca ictimai birlik əldə olunmayacaq.

InterPress.ge xəbər verir ki, Mamuka Mdinaradze bu barədə keçirilən brifinqdə danışıb. O qeyd edib ki, bir tərəf saxlanılan şəxsləri “vicdan məhbusu”, digər tərəf isə “cinayətkar” adlandırdığı müddətdə cəmiyyətdə razılıq əldə etmək mümkün deyil.

“Bir tərəfdən onların vicdan məhbusu, digər tərəfdən isə cinayətkar adlandırılması şəraitində razılıq, ictimai həmrəylik və birlik mümkün olmayacaq”, – deyə Mdinaradze bildirib.

Onun sözlərinə görə, din xadimləri və Sinod üzvləri “vicdan məhbusları” ifadəsini işlətməyiblər, yalnız peşmanlıq ifadə edən şəxslərin əfv olunmasının mümkünlüyündən danışıblar.

“Onlar bildiriblər ki, etdiyi əmələ görə peşman olan şəxsin əfv edilməsi yaxşı addım olar və mən də bununla razıyam. Əgər insan törətdiyi əməli etiraf edir və peşmanlığını bildirirsə, dövlət belə şəxslərə qarşı həmişə daha humanist yanaşır”, – deyə vitse-baş nazir vurğulayıb.

Mamuka Mdinaradze hesab edir ki, “vicdan məhbusu” ifadəsinin istifadə olunması qəsdən yaradılmış maneədir və bu, əfv məsələsinin aktuallaşmasına əngəl törədir.

O bildirib ki, 5-6 il əvvəl “vicdan məhbusu” anlayışı dövlətin aşkar ədalətsizlik etdiyi şəxslər üçün işlədilirdi, lakin zamanla bu ifadə dəyərini itirib.

“Bu termin o qədər ucuzlaşdırılıb ki, artıq ciddi görünmür. Mən onların vəkillərindən biri olsaydım, kiminsə vicdan məhbusu adlandırılmasına özüm etiraz edərdim. Çünki bu ifadə artıq o qədər qeyri-ciddi səslənir ki, digər arqumentlərə də ciddi yanaşılmır”, – deyə Mdinaradze qeyd edib.

Vitse-baş nazir əlavə edib ki, o, vətəndaş olaraq peşmanlıq ifadə ediləcəyi halda istənilən humanist qərarı dəstəkləyər.

“Əgər insan etdiyi əməlin ağırlığını anlayaraq əfv istəyirsə, əlbəttə ki, mən buna qarşı çıxmaram”, – deyə Mamuka Mdinaradze bildirib.