Nərgiz Əliyeva: Patriarx sadəcə illərdir gizli aparılan siyasəti açıq şəkildə dilə gətirdi

Müxalif Vahid Milli Hərəkat partiyasının üzvü və keçmiş bələdiyyə deputatı Nərgiz Əliyeva Patriarx Üçüncü Şionun son bəyanatına münasibət bildirib.

InterPress.ge xəbər verir ki, Nərgiz Əliyeva bununla bağlı sosial şəbəkədə paylaşım edib. O qeyd edib ki, Patriarxın açıqlaması icma tərəfindən birmənalı qarşılanmasa da, bu yanaşma yeni deyil və illərdir davam edir.

“Patriarxın bəyanatı haqlı olaraq icmamız tərəfindən birmənalı qarşılanmadı. Lakin bu proses uzun illərdir davam etmirmi? Bunu yeni hiss etdiniz?” – deyə Əliyeva yazıb.

Onun sözlərinə görə, bölgədə ailə dəyərləri, təhsil, mədəniyyət və milli azlıqların inteqrasiyası ilə bağlı ciddi problemlər mövcuddur və bu istiqamətdə dövlət proqramları kifayət qədər deyil.

“Bölgədə inteqrasiya ilə bağlı hansı layihələr həyata keçirilir? Milli azlıqların inkişafı üçün hansı dövlət proqramları reallaşdırılır? Son illərdə bölgədə boşanmaların sayı niyə artır? Təhsil, mədəniyyət və mənəviyyat niyə sıfır səviyyəsində qalıb?” – deyə o bildirib.

Nərgiz Əliyeva həmçinin azərbaycanlı icmasına qarşı stereotiplərin formalaşdırıldığını iddia edib.

“Ailədaxili şiddət və qadın hüquqlarının pozulması məsələlərində ‘bunu müsəlmanlar edir’ stereotipini kim yaradır? Hakimiyyət rəsmilərinin çıxışlarında sətiraltı mesajlar və ya birbaşa bəyanatlar eşitmirdinizmi ki, bizə ikinci sort insan kimi baxılır?” – deyə keçmiş deputat qeyd edib.

O bildirib ki, bölgədə narkomaniya, kriminal hallar və sosial problemlərin artması da ciddi narahatlıq doğurur.

“Patriarx sadəcə bunu açıq şəkildə dedi. Halbuki bu siyasət illərdir gizli şəkildə davam edir və çoxları bunun fərqində deyil. Əsl səbəb də elə budur. Kütləvi köç, ailə institutunun zəifləməsi və təhsilin geriləməsi bizim kökümüzün azalmasına, artımımızın qarşısının alınmasına xidmət edir”, – deyə Nərgiz Əliyeva vurğulayıb.

Paylaşımının sonunda o, insanları hüquqlarını tələb etməyə çağırıb.

“Oyanın. Ən azından hər sahədə haqqınızı tələb edin ki, bu cür çirkli oyunlara məruz qalmayasınız”, – deyə Nərgiz Əliyeva bildirib.