ICG: ABŞ və Avropa Gürcüstanı Rusiyaya qarşı prosesə cəlb etməyə çalışıb
Rusiyanın Ukraynaya ilk hücumu 2008-ci ildə Rusiya işğalını yaşamış Gürcüstanda ciddi narahatlıq yaradıb və hakimiyyətdə ölkənin növbəti hədəf ola biləcəyi ilə bağlı qorxu formalaşıb.
InterPress.ge xəbər verir ki, bu barədə International Crisis Group (ICG) tərəfindən yayımlanan icmalda qeyd olunub. Sənəddə bildirilir ki, ABŞ və Avropa dərhal Gürcüstanı Rusiyaya qarşı mübarizə prosesinə cəlb etməyə çalışıb.
Məqalədə qeyd olunur ki, ABŞ özəl kanallar vasitəsilə Gürcüstana Ukraynaya müəyyən formada yardım göstərilməsi ilə bağlı müraciət edib. Buraya Gürcüstan arsenalından Kiyevə silah göndərilməsi və ya Rusiyaya qarşı ikitərəfli sanksiyaların tətbiqi kimi məsələlər daxil olub. Bildirilib ki, Vaşinqton daha sonra göndərilən silahları əvəz etməyə hazır idi.
Eyni zamanda, Brüssel dəfələrlə “Gürcü Arzusu” hakimiyyətini ölkənin xarici siyasətini Avropa İttifaqının siyasəti ilə uyğunlaşdırmağa çağırıb.
ICG qeyd edir ki, Gürcüstan hakimiyyəti bu çağırışları ölkənin qərbyönlü kursundan istifadə etməklə onu təhlükəli prosesə sürükləmək cəhdi kimi qəbul edib və bunun gürcü xalqı üçün dağıdıcı nəticələr doğura biləcəyini düşünüb.
“ABŞ bu tələblərin təxribat xarakterli olduğunu düşünməyə bilərdi, çünki oxşar çağırışlar dünyanın müxtəlif tərəfdaş ölkələrinə də edilirdi. Lakin hər iki tərəfin rəsmiləri indi bildirirlər ki, Vaşinqton Gürcüstanın özünəməxsus həssaslığını nəzərə almayıb”, – deyə icmalda qeyd olunur.
Sənəddə bildirilir ki, Gürcüstan hakimiyyəti bu tələbləri rədd edib və əvəzində Rusiyanı qıcıqlandırmamağa çalışıb. Paralel olaraq, Moskva ilə iqtisadi əlaqələrin dərinləşdirilməsinə üstünlük verilib – Rusiya şəhərləri ilə birbaşa uçuşlar bərpa olunub, neft və qaz alışları artırılıb.
ICG-in qiymətləndirməsinə əsasən, Gürcüstanın Ukrayna müharibəsinə qoşulmamaq siyasəti Avropa Parlamentinin bəzi qətnamələrində, eləcə də ABŞ və Avropa İttifaqının bəzi qanunvericilərinin bəyanatlarında sərt tənqid olunub.
Bununla belə, Avropa İttifaqı rəsmiləri həmin açıqlamaların Aİ-nin rəsmi mövqeyini əks etdirmədiyini bildiriblər. Lakin Gürcüstanın siyasi spektrinin hər iki tərəfi bu bəyanatları Brüsselin real münasibəti kimi qəbul edib və bu da bir sıra siyasi böhranlara səbəb olub.
Məqalədə vurğulanır ki, müxalifət, tənqidi QHT-lər və media üçün Avropa rəsmilərinin narazılığı hakimiyyətə qarşı xarici müdaxilə ümidlərini artırıb. “Gürcü Arzusu” üçün isə bu vəziyyət Gürcüstanın müharibəyə cəlb olunması ilə bağlı qorxuların gücləndirilməsi üçün əsas yaradıb.
