Tbilisidə üç nəfər bıçaqlı hücum ittihamı ilə saxlanıldı

Gürcüstan polisi qrup halında qəsdən yüngül bədən xəsarəti yetirmək ittihamı ilə əvvəllər məhkum olunmuş üç nəfəri saxlayıb.

InterPress.ge xəbər verir ki, bu barədə Gürcüstan Daxili İşlər Nazirliyi məlumat yayıb. Bildirilib ki, təqsirləndirilən şəxslər mübahisə zəminində bir nəfərə soyuq silahla xəsarət yetiriblər.

Məlumata görə, əməliyyatı Daxili İşlər Nazirliyinin Tbilisi Polis Departamentinin Köhnə Tbilisi Baş İdarəsinin əməkdaşları həyata keçiriblər.

İstintaqla müəyyən edilib ki, saxlanılan şəxslər Tbilisidə bir nəfərlə fiziki qarşıdurmaya girərək ona bıçaqla xəsarət yetiriblər.

Yaralı şəxs tibbi yardım göstərilməsi məqsədilə xəstəxanaya çatdırılıb.

Polis tərəfindən aparılan istintaq tədbirləri nəticəsində hadisədə iştirak edən hər üç şəxs təqsirləndirilən şəxs qismində saxlanılıb.

Hüquq-mühafizə orqanları tərəfindən cinayətin aləti olan bıçaq maddi sübut kimi götürülüb.

Faktla bağlı Gürcüstan Cinayət Məcəlləsinin 120-ci maddəsi ilə istintaq aparılır.

Həmin maddə 5 ilədək azadlıqdan məhrumetmə cəzasını nəzərdə tutur.