Hökumət dövlət satınalmaları ilə bağlı qanunvericiliyə dəyişiklik edir

Gürcüstan Parlamenti hökumətin təşəbbüsü ilə dövlət satınalmaları ilə bağlı qanunvericiliyə dəyişiklikləri sürətləndirilmiş qaydada müzakirə edəcək.

InterPress.ge xəbər verir ki, bu barədə hökumətin parlament katibi Vaxtanq Baçiaşvili məlumat verib.

Onun sözlərinə görə, dəyişikliklərin məqsədi satınalma həyata keçirən qurumlar tərəfindən büdcə vəsaitlərinin daha səmərəli xərclənməsini təmin edəcək mexanizmlərin tətbiqidir.

Qanunvericilikdə “qara siyahı” və diskvalifikasiya ilə bağlı yeni tənzimləmələrin tətbiqi nəzərdə tutulur.

Hazırda qüvvədə olan qanuna əsasən, “qara siyahı”ya düşmək bir il müddətində dövlət müqavilələrində iştirak hüququnun məhdudlaşdırılması deməkdir. Vaxtanq Baçiaşvilinin izahına görə, öhdəliklərin lazımınca yerinə yetirilməməsinə görə “qara siyahı”ya düşmə halları ilə müqavilə əldə etmək məqsədilə vicdansız hərəkətlər edən şəxslərlə bağlı hallar bir-birindən ayrılacaq.

Bu halda dövlət satınalmalarında iştirak qadağası bir ildən iki ilədək artırılır və məhdudiyyət yalnız həmin iqtisadi operatora deyil, onun təsisçilərinə və tərəfdaşlarına da şamil olunacaq.

Hökumətin parlament katibinin sözlərinə görə, qanun layihəsi kiçik və orta biznesin inkişafına xüsusi diqqət ayırır. Bu isə subpodratçı anlayışının institusional şəkildə tətbiqi və onun istifadəsinin hüquqi çərçivəsinin müəyyənləşdirilməsi ilə bağlıdır.

Qanun layihəsinin qəbulundan sonra subpodratçılarla bağlı hüquqi münasibətlərin qaydaları müəyyən ediləcək. Buraya subpodratçıların seçilməsi, məsuliyyət bölgüsü və nəzarət mexanizmləri də daxildir.

“Həmin dəyişikliklər nəticəsində həm kiçik və orta biznesin iqtisadi imkanlarının, həm də ümumilikdə dövlət satınalmaları sisteminin səmərəliliyinin artacağı gözlənilir”, – deyə hökumətin açıqlamasında bildirilir.