Ermənistanda eksit-poll: Paşinyanın partiyası seçkilərdə inamlı üstünlüklə irəlidədir

Ermənistanın hakim “Vətəndaş Müqaviləsi” Partiyasının sifarişi ilə keçirilmiş eksit-pollun nəticələrinə əsasən, Baş nazir Nikol Paşinyanın siyasi qüvvəsi parlament seçkilərində inamlı liderlik edir.

InterPress.ge xəbər verir ki, sorğunun nəticələrinə görə, Nikol Paşinyanın rəhbərlik etdiyi “Vətəndaş Müqaviləsi” Partiyası seçicilərin 56,7 faizinin dəstəyini qazanır.

Məlumata əsasən, biznesmen Samvel Karapetyanla əlaqələndirilən Rusiyameylli müxalif “Güclü Ermənistan” bloku isə 17,5 faiz səs toplayır.

Xatırladaq ki, Ermənistanda parlament seçkiləri üzrə səsvermə prosesi yerli vaxtla saat 20:00-da başa çatıb. Bundan sonra seçki məntəqələrində bülletenlərin sayılmasına başlanılıb.

Ermənistan Mərkəzi Seçki Komissiyasının ilkin məlumatına görə, seçici fəallığı 58,9 faiz təşkil edib. Səsvermədə ümumilikdə 1 476 597 vətəndaş iştirak edib.

Qeyd edək ki, bu göstərici 2021-ci ildə keçirilmiş parlament seçkiləri ilə müqayisədə xeyli yüksəkdir. Həmin seçkilərdə seçicilərin 49,4 faizi səsvermədə iştirak etmişdi.