Papauaşvili parlamentdə media akkreditasiyası qaydalarının sərtləşdirildiyini açıqlayıb
Gürcüstan parlamentinin sədri Şalva Papauaşvilinin əmri ilə parlamentdə akkreditasiya sisteminə dəyişikliklər edilir. Dəyişikliklər həm ayrı-ayrı jurnalistlərə, həm də media qurumlarına şamil olunacaq.
InterPress.ge xəbər verir ki, bu barədə Gürcüstan parlamentinin sədri Şalva Papauaşvili açıqlama verib.
Onun sözlərinə görə, parlamentin akkreditasiya qaydalarının təkrar pozulması halında jurnalistlərin akkreditasiyası 1 ilədək müddətə dayandırılacaq. Həmçinin pozuntunun ağırlığı və təkrarlanma tezliyi nəzərə alınmaqla media qurumunun akkreditasiyasının da 1 ilədək ləğv edilməsi mümkün olacaq.
Papauaşvili bildirib ki, dəyişikliklər hazırlanarkən Avropa Parlamentində tətbiq olunan akkreditasiya sistemi öyrənilib.
“Bilirsiniz ki, indiyədək Gürcüstan parlamentində akkreditasiya qaydalarının pozulmasına görə ilk dəfə 1 aylıq, təkrar halında isə 6 aylıq akkreditasiya dayandırılması tətbiq edilirdi. Avropa Parlamentində isə bir ilədək dayandırılma mexanizminin olduğunu gördük. Buna görə də sistemimizi Avropa Parlamentinin sistemi ilə yaxınlaşdırırıq. İlk pozuntuya görə 1 ay, təkrar pozuntuya görə isə 1 ilədək akkreditasiyanın dayandırılması mümkün olacaq”, – deyə Papauaşvili bildirib.
Parlament sədrinin sözlərinə görə, indiyədək sanksiyalar yalnız jurnalistlərə tətbiq olunurdu, lakin Avropa Parlamentinin təcrübəsində media qurumlarının özlərinə qarşı da tədbirlərin görüldüyü müəyyən edilib.
“Bu səbəbdən Gürcüstanın akkreditasiya sistemini Avropa sisteminə yaxınlaşdırırıq və pozuntunun ağırlığı və tezliyi nəzərə alınmaqla, bütövlükdə media qurumunun akkreditasiyası da 1 ilədək ləğv edilə biləcək”, – o qeyd edib.
Papauaşvili əlavə edib ki, Avropa Parlamentində jurnalistin müsahibə götürməzdən əvvəl deputatdan ilkin razılıq alması tələbi mövcuddur. Lakin Gürcüstan parlamentində belə qaydanın tətbiqi hələlik nəzərdə tutulmur.
“Bu baxımdan Avropa Parlamentinin daha sərt yanaşmasını hələlik Gürcüstan parlamentinin akkreditasiya sisteminə keçirməyəcəyik”, – deyə Şalva Papauaşvili vurğulayıb.
