Kobaxidze: Bidzina İvanişvilinin Gürcüstanda dövlətçiliyin və demokratiyanın möhkəmlənməsində rolu müstəsnadır

Gürcüstanın Baş naziri İrakli Kobaxidze bildirib ki, Bidzina İvanişvilinin ölkədə dövlətçiliyin, demokratiyanın və insan hüquqlarının möhkəmləndirilməsində xüsusi rolu var.

InterPress.ge xəbər verir ki, bu barədə Gürcüstanın Baş naziri İrakli Kobaxidze hökumət administrasiyasında keçirilən brifinqdə danışıb.

Kobaxidzenin sözlərinə görə, xarici qüvvələrin və onların yerli tərəfdarlarının əsas hədəfi məhz Bidzina İvanişvilidir.

“Hamınıza yaxşı məlumdur ki, ölkənin xarici düşmənlərinin və onların yerli agenturasının aqressiyasının və siyasi hücumlarının əsas hədəfi cənab Bidzina İvanişvilidir. Onların iddiasına görə, ölkə demokratik qaydalarla deyil, Bidzina İvanişvili tərəfindən təkbaşına idarə olunur. Bundan əlavə, onlar demokratik yolla seçilmiş hakimiyyəti ‘İvanişvili rejimi’ adlandıraraq, 2012-ci ildən formalaşmış demokratiyanı avtoritarizm kimi təqdim etməyə çalışırlar”, – deyə Baş nazir bildirib.

Kobaxidze qeyd edib ki, bu cür bəyanatlar son günlər keçirilən televiziya debatlarında da səsləndirilib və bu səbəbdən o, məsələ ilə bağlı öz mövqeyini ictimaiyyətə çatdırmaq qərarına gəlib.

Baş nazirin sözlərinə görə, İvanişvili “siyasətin qrossmeysteridir” və öz xalqını, eləcə də ölkəsini sevir.

“Bunu dəfələrlə demişəm və bir daha qeyd etmək istəyirəm ki, cənab Bidzina İvanişvili siyasətin qrossmeysteridir və o, öz xalqını və ölkəsini sevir. Onun siyasi çəkisi iki əsas amilə əsaslanır – yüksək intellekt və təmənnasız vətənpərvərlik”, – deyə Kobaxidze vurğulayıb.

Baş nazir bildirib ki, məhz bu keyfiyyətlər İvanişviliyə 2012-ci ildə hakimiyyət dəyişikliyini həyata keçirməyə imkan verib.

“Bu iki xüsusiyyət ona 2012-ci ildə hamının qeyri-mümkün hesab etdiyi işi görməyə imkan verdi – ölkə xaricindən dəstək alan qüvvələri hakimiyyətdən uzaqlaşdırdı. Həmin dövrdə heç kim belə bir rejimin hakimiyyətdən kənarlaşdırılacağını təsəvvür etmirdi. Bidzina İvanişvili bunu zorakılıq və təhqir olmadan həyata keçirdi və ölkədə insan hüquqlarına əsaslanan demokratik idarəetmənin formalaşmasına şərait yaratdı”, – deyə İrakli Kobaxidze bildirib.