İrakli Kobaxidze istefası ilə bağlı: "Bunu yalnız Allah bilir, mən bilmirəm"
Gürcüstanın Baş naziri İrakli Kobaxidze jurnalistin "Sizin vəzifədən getməyinizin vaxtı nə zaman gələcək?" sualına cavab olaraq bildirib ki, bu məsələnin cavabını yalnız Allah bilir və o, bu barədə fərziyyələr irəli sürmək niyyətində deyil.
InterPress.ge xəbər verir ki, Baş nazirin sözlərinə görə, bu cür qərarlar adətən komanda tərəfindən qəbul olunur.
"Onu Allah bilir. Mən bilmirəm. Siz müxtəlif ehtimallar irəli sürə, qəhvə falına baxa bilərsiniz, amma mən bunu etmək fikrində deyiləm. Belə məsələləri adətən komanda həll edir. Bir istisna Qaxaria ilə bağlı olmuşdu. O, çünki 'atanın istəyi belə idi', özü qərar verdi. Ona tapşırıq verildi və istefa verdi. Amma bir qayda olaraq, bu cür qərarları 'Gürcü Arzusu' komandası kollektiv şəkildə qəbul edir", – deyə Kobaxidze bildirib.
Baş nazir qeyd edib ki, onun istefası ilə bağlı suallar ona dəfələrlə ünvanlanıb və artıq bu mövzu "qeyri-ciddi və yorucu" xarakter alıb.
"Mənə sizin bu suallarınız bezdirici gəlmir, əgər siz özünüz bezməmisinizsə. Mən hər dəfə bu sualları dinləməyə hazıram. Bu sualları iki il əvvəl də eşitmişəm, dörd il əvvəl də, müxtəlif vəzifələrdə olarkən, ötən il də, altı ay əvvəl də, üç ay əvvəl də, indi də. Mən bezmirəm, siz bezməmisinizsə, məmnuniyyətlə cavab verərəm.
Cavabı artıq vermişəm. Bütün bunlar qeyri-ciddidir. Avropa Komissiyası kimi hər üç aydan bir çıxıb eyni sualı verməyiniz, eyni şeyləri deməyiniz bezdirici və qeyri-ciddi deyilmi?" – deyə o bildirib.
Kobaxidze həmçinin dünən keçirdiyi brifinqə də toxunaraq qeyd edib ki, əsas mövzu ölkənin necə idarə olunması idi və cəmiyyətə bu barədə məlumat verilməsi vacib sayılıb.
Onun sözlərinə görə, komanda daxilində Bidzina İvanişvilinin mövqeyinin tez-tez üstünlük qazanmasının səbəbi ona olan yüksək etimaddır.
"Bidzina İvanişvilinin təcrübəsinə və səriştəsinə komandamızın xüsusi etimadı var. Əgər onun xüsusi intellekti və peşəkarlığı olmasaydı, insanlar qanlı rejimin hakimiyyətdən uzaqlaşdırılmasını nəinki çətin, hətta mümkünsüz hesab edirdilər. O, belə böyük bir gücə qarşı çıxaraq onu hakimiyyətdən uzaqlaşdırdı. 2012-ci il hadisələri komandada Bidzina İvanişvilinin siyasəti xüsusi hesablamalarla planlaşdırmaq qabiliyyətinə malik olması barədə inamı daha da möhkəmləndirdi", – deyə Baş nazir vurğulayıb.
