Tbilisidə mağazaları qarət edən iki nəfər saxlanılıb – Onlardan biri şərti cəza altında olan azyaşlıdır

Tbilisidə bir neçə mağazadan oğurluq etməkdə təqsirləndirilən iki nəfər polis tərəfindən saxlanılıb. Saxlanılanlardan biri əvvəllər məhkum olunmuş və hazırda şərti cəza altında olan azyaşlıdır.

InterPress.ge xəbər verir ki, bu barədə Gürcüstan Daxili İşlər Nazirliyi məlumat yayıb. Bildirilib ki, Tbilisi Polis Departamentinin Vake-Saburtalo Baş İdarəsinin əməkdaşlarının həyata keçirdiyi əməliyyat-axtarış və istintaq tədbirləri nəticəsində oğurluqda şübhəli bilinən hər iki şəxs saxlanılıb.

İstintaqla müəyyən edilib ki, təqsirləndirilən şəxslər Tbilisinin Çavçavadze prospektində yerləşən bir neçə mağazaya qanunsuz daxil olaraq, ümumilikdə 2 min lariyə qədər pul vəsaitini ələ keçiriblər. Bundan sonra onlar hadisə yerindən qaçıblar.

"Hüquq-mühafizə orqanlarının əməkdaşları tərəfindən keçirilmiş əməliyyat və istintaq tədbirləri nəticəsində cinayəti törədən hər iki şəxs təqsirləndirilən şəxs qismində saxlanılıb", – deyə Daxili İşlər Nazirliyinin məlumatında qeyd olunub.

Faktla bağlı Gürcüstan Cinayət Məcəlləsinin 177-ci maddəsi ilə istintaq aparılır. Həmin maddə 7 ilədək azadlıqdan məhrumetmə cəzasını nəzərdə tutur.