Marneulidə yerləşən "Geo Hospitals" klinikasının döyülən mühafizəçisi həyatını itirib

Marneulidə yerləşən "Geo Hospitals" klinikasının mühafizəçisi aprelin 11-də xidməti vəzifəsini yerinə yetirərkən məruz qaldığı fiziki zorakılıqdan sonra vəfat edib. Hadisə ictimaiyyət arasında ciddi rezonans doğurub.

InterPress.ge xəbər verir ki, "Geo Hospitals"un mühafizə əməkdaşı uzun müddət süni tənəffüs aparatına qoşulu vəziyyətdə idi və həkimlərin səylərinə baxmayaraq, onun həyatını xilas etmək mümkün olmayıb.

InterPress.ge-yə ailə üzvlərinin verdiyi məlumata istinadən bildirir ki, insident xəstəxanada qəbul saatlarının başa çatmasından sonra baş verib. Belə ki, pasiyentin yaxınlarından biri orta yaşlı kişinin klinikaya buraxılmasını tələb edib. Mühafizəçi müəyyən edilmiş qaydalara uyğun olaraq bu tələbə imtina cavabı verdikdən sonra ona qarşı fiziki zorakılıq tətbiq olunub.

Məlumata görə, aldığı ağır xəsarətlər nəticəsində komaya düşən mühafizəçi bir müddət reanimasiya şöbəsində süni tənəffüs dəstəyi altında saxlanılıb. Lakin sonradan onun həyatını itirdiyi bildirilib.

Faktla bağlı hüquq-mühafizə orqanları tərəfindən bir nəfər saxlanılıb.