Kaxa Kaladze: Bu qətnamələrin heç bir dəyəri yoxdur, Gürcüstan heç kimin arxa həyəti deyil

Tbilisi meri və hakim “Gürcü Arzusu” Partiyasının baş katibi Kakha Kaladze Avropa Parlamentinin Gürcüstanla bağlı qəbul etdiyi qətnaməni tənqid edib.

InterPress.ge xəbər verir ki, Kaladzenin sözlərinə görə, bu tip qətnamələrin heç bir real dəyəri yoxdur və onlar həqiqəti əks etdirmir.

“Biz çoxlu belə qətnamələr görmüşük və onların necə qəbul edildiyini yaxşı bilirik. Bu qətnamələrin heç bir qiyməti yoxdur. Burada yalnız yalanlar var, konkret faktlar və həqiqət isə yoxdur. Keçmişdə də eyni məzmunlu çoxsaylı qətnamələr qəbul olunub”, – deyə Kaladze bildirib.

Onun sözlərinə görə, Gürcüstana qarşı böhtan və təzyiq siyasəti davam edir.

“Bu münasibət qətiyyən qəbuledilməzdir. Biz dəfələrlə demişik ki, dialoqa hazırıq, oturub danışmağa hazırıq. Amma elə yox ki, kimsə yuxarıdan barmağını silkələyərək bizə göstəriş versin”, – deyə o vurğulayıb.

Kaladze qeyd edib ki, Gürcüstan müstəqil və suveren dövlətdir və ölkəyə hörmətlə yanaşılmalıdır.

“Gürcüstan heç kimin arxa həyəti deyil. Bu, müstəqil və suveren dövlətdir. Hər kəs gürcü xalqına hörmət etməlidir”, – deyə Tbilisi meri əlavə edib.