Kobaxidze: Xalqın seçdiyi hakimiyyəti tanımamaq Gürcüstanın suverenliyini tanımamaqdır

Gürcüstanın Baş naziri İrakli Kobaxidze bildirib ki, hökumət ölkənin suverenliyinin tanınmamasına qarşı mübarizə aparır və bu siyasəti Avropa Parlamentinə münasibətdə də həyata keçirməyə hazırdır.

InterPress.ge xəbər verir ki, İrakli Kobaxidze bu barədə jurnalistlərə açıqlamasında danışıb. Baş nazirin sözlərinə görə, xalq tərəfindən seçilmiş hakimiyyətin tanınmaması ölkənin suverenliyinə qarşı yönəlmiş addımdır.

“Biz tanınmama siyasətinə qarşı müxtəlif istiqamətlərdə fəaliyyət göstəririk və Avropa Parlamentinə münasibətdə də belə siyasət aparmağa hazırıq. Rusiya Federasiyası və daha dörd dövlət Gürcüstanın Abxaziya və Tsxinvali regionları üzərində suverenliyini tanımır. Eyni şəkildə, Avropa Parlamenti də Gürcüstanın bütün ərazisi üzərində suverenliyini tanımır. Bu onların işidir. Biz isə buna qarşı siyasət aparırıq”, – deyə Kobaxidze bildirib.

Baş nazir qeyd edib ki, xalq tərəfindən seçilmiş hakimiyyətin tanınmaması ölkənin suverenliyinə qarşı hücum kimi qiymətləndirilməlidir.

“Xalqın seçdiyi hakimiyyəti tanımadıqda, bu, ölkənin suverenliyinə hücum deməkdir. Biz bu siyasətə qarşı çıxacağıq. Məqsədimiz odur ki, həm Rusiya Dövlət Duması, həm də Avropa Parlamenti Gürcüstanın suverenliyini və ərazi bütövlüyünü tanısın. Biz bu istiqamətdə işləyəcəyik”, – deyə o vurğulayıb.

İrakli Kobaxidze çıxışında Avropa Parlamentini də tənqid edib.

“Bugünkü vəziyyətinə, yanaşmalarına və fəaliyyət prinsiplərinə görə Avropa Parlamenti Sovet İttifaqı Ali Sovetini xatırladır. Onların işləmə üsullarında sovet yanaşmaları görünür. Bu, faciəvi vəziyyətdir”, – deyə Baş nazir bildirib.