ABŞ, İsrail və Livan üçtərəfli çərçivə sazişi imzalayıb
ABŞ, İsrail və Livan üçtərəfli çərçivə sazişi imzalayıb.
InterPress.ge xəbər verir ki, bu barədə ABŞ Dövlət Departamenti məlumat yayıb.
"Bu gün İsrail və Livan hökumətləri cəsarətli qərar qəbul edərək sonsuz münaqişədən çıxış üçün real yol yaradan çərçivə sazişi üzərində razılığa gəliblər. Bu saziş Livanın suverenliyinin bərpası, 'Hizbullah'ın silahsızlaşdırılması və onun terrorçu infrastrukturunun ləğvi üçün aydın və strukturlaşdırılmış proses müəyyən edir. Eyni zamanda, İsrail vətəndaşlarına yönəlmiş təhlükə aradan qaldırıldıqdan sonra ölkənin öz sərhədlərinə təhlükəsiz şəkildə qayıtmasına imkan yaradır.
Saziş, həmçinin ABŞ-ın vasitəçiliyi ilə Livan üçün Üçtərəfli Hərbi Koordinasiya Qrupunun (MCG4L) yaradılmasını nəzərdə tutur. Bu mexanizm tərəflərə çərçivə sazişinin icrasını koordinasiya etməyə imkan verəcək.
Livan üçün bu çərçivə sazişi uzunmüddətli böhrandan çıxmaq üçün real yol açır. İsrail üçün isə şimal sərhədinə yönəlmiş daimi təhlükənin aradan qaldırılması üçün etibarlı zəmin yaradır", - deyə ABŞ Dövlət Departamentinin bəyanatında bildirilir.
Bəyanatda qeyd olunur ki, ABŞ prosesdə tam şəkildə iştirakını davam etdirəcək və mühüm resurslar ayıracaq. Bu çərçivədə BMT ilə koordinasiya əsasında dərhal 100 milyon ABŞ dolları həcmində humanitar yardım göstərilməsi planlaşdırılır.
Bundan əlavə, ABŞ Livan Silahlı Qüvvələrinin imkan və bacarıqlarını gücləndirməyi planlaşdırır ki, onlar ölkənin bütün ərazisində dövlət suverenliyini daha effektiv şəkildə təmin edə bilsinlər. Bu məqsədlə ABŞ Müdafiə Nazirliyi Livan Silahlı Qüvvələrinə 30 milyon ABŞ dollarından çox vəsait ayırmağa hazır olduğunu bildirib. Qeyd olunur ki, bu dəstək Prezident Donald Trampın Livanda davamlı sülhün təmin olunması ilə bağlı baxışına xidmət edir.
