Rusiyada yanacaq böhranı süd məhsullarının tədarükünü təhlükə altına salıb
Rusiyanın süd məhsulları istehsalçıları yanacaq böhranı səbəbindən tədarükdə gecikmələrin yarana biləcəyi barədə pərakəndə satış şəbəkələrini xəbərdar ediblər.
InterPress.ge xəbər verir ki, bu barədə Forbes nəşri "Xalq Fermeri" Assosiasiyasının ticarət şəbəkələrinə ünvanladığı məktuba istinadən məlumat yayıb.
Assosiasiya Rusiyanın 72 regionunda fəaliyyət göstərən 14 mindən çox fermer və emal müəssisəsini birləşdirir.
Məktubda bildirilir ki, kənd təsərrüfatı istehsalçıları yaranmış vəziyyət səbəbindən müqavilələrdə nəzərdə tutulan tədarük öhdəliklərini vaxtında yerinə yetirmək imkanını itiriblər.
"Xalq Fermeri" Assosiasiyasının məlumatına görə, Udmurtiya, Volqoqrad və Həştərxan vilayətlərində fəaliyyət göstərən istehsalçılar artıq tədarük gecikmələri ilə üzləşiblər. Bu səbəbdən süd məhsulları tədarükçüləri ticarət şəbəkələrindən gecikmələrə görə cərimə və digər sanksiyaların tətbiq edilməməsini xahiş ediblər.
Rusiyada hər ay on minlərlə yükdaşımaya xidmət göstərən Pooling platforması da son dövrlərdə çatdırılma müddətlərində ciddi gecikmələrin qeydə alındığını bildirib.
Eyni zamanda, INFOLine analitik şirkətinin məlumatına əsasən, bəzi regionlarda sosial əhəmiyyətli məhsulların qıtlığına dair ilk əlamətlər artıq müşahidə olunur. Bunlara tez xarab olan məhsullar – ət, süd və yumurta daxildir.
Şirkətin qiymətləndirməsinə görə, vəziyyət hələ kritik həddə çatmasa da, pərakəndə satış şəbəkələrinin paylama mərkəzlərində bir neçə həftəlik, bəzi hallarda isə bir neçə aylıq ehtiyat mövcuddur. Lakin yanacaq qıtlığı davam edərsə və vəziyyət yaxşılaşmasa, problem daha da dərinləşə bilər.
Ekspertlər hesab edirlər ki, istehsalçılar artıq xeyli əvvəl Sənaye və Ticarət Nazirliyinə müraciət edərək çatdırılma gecikmələrinə görə tətbiq olunan cərimələrə moratorium qoyulmasını tələb etməli idilər.
Onların fikrincə, hökumət istehsalçıları dəstəkləyərək pərakəndə satış şəbəkələrinin tətbiq etdiyi cərimələri məhdudlaşdırarsa, bazarda məhsul qıtlığı yarana bilər. Əks halda isə tədarükçülər maliyyə itkiləri səbəbindən iflas riski ilə üzləşə bilərlər.
Rusiya Sənaye və Ticarət Nazirliyi isə hazırda vəziyyəti kritik hesab etmir. Nazirlik iyunun 30-da pərakəndə satış sektoru ilə daimi əlaqədə olduğunu açıqlasa da, istehsalçıların dəstəklənməsi üçün konkret tədbirlər planı barədə məlumat verməyib.
Qeyd edək ki, Federal "Aqroeksport" Mərkəzinin məlumatına görə, Gürcüstan dəyər baxımından Rusiyadan süd məhsulları idxal edən əsas ölkələrdən biridir və ilk beşliyi tamamlayır. Belə ki, cari ilin birinci rübündə Gürcüstana 4,5 milyon ABŞ dollarından çox dəyərində Rusiya süd məhsulları ixrac olunub.
Rusiyadan Gürcüstana ixrac edilən əsas süd məhsulları sırasında pendir və kəsmik, fermentləşdirilmiş süd məhsulları, süd və qaymaq, zərdab məhsulları, həmçinin dondurma yer alır.
