ABŞ İran neftinə qarşı sanksiyaları yenidən tətbiq etdi – Hörmüz boğazındakı hücumlardan sonra gərginlik artıb

ABŞ İranın Hörmüz boğazında kommersiya gəmilərinə hücumlar həyata keçirməsindən sonra İran neftinə qarşı sanksiyaları yenidən qüvvəyə mindirib.

InterPress.ge xəbər verir ki, bu barədə Reuters agentliyi məlumat yayıb.

Məlumata görə, ABŞ Maliyyə Nazirliyi ötən ay Tehran və Vaşinqton arasında əldə olunmuş kövrək razılaşma çərçivəsində İranın neft satışına 21 avqust tarixinədək icazə vermişdi. Lakin çərşənbə axşamı qəbul edilən qərarla bu müddət 17 iyul tarixinədək qısaldılıb.

Reuters bildirir ki, İran neftinə qarşı sanksiyaların bərpa olunması fonunda dünya bazarında neftin qiyməti 5 faizdən çox artıb.

İran isə ABŞ-ın bu addımını pisləyərək, bunu ötən ay iki ölkə arasında əldə olunmuş qarşılıqlı anlaşma memorandumunun açıq şəkildə pozulması kimi qiymətləndirib.

İran Xarici İşlər Nazirliyi bəyan edib ki, bu öhdəliyin pozulmasının bütün nəticələrinə görə məsuliyyət ABŞ hökumətinin üzərinə düşür.

Nazirlik həmçinin vurğulayıb ki, İran milli təhlükəsizliyini qorumaq üçün zəruri hesab etdiyi bütün tədbirləri görəcək.

Xatırladaq ki, İran bazar ertəsi və çərşənbə axşamı Hörmüz boğazında ticarət gəmilərinə üç hücum həyata keçirib.