İran parlamentinin sədri: "Təzyiq və şantaj dövrü başa çatıb, biz təslim olmayacağıq"

İran parlamentinin sədri Məhəmməd Baqir Qalibaf ABŞ-ı Tehran və Vaşinqton arasında imzalanmış qarşılıqlı anlaşma memorandumunu pozmaqda ittiham edib.

InterPress.ge xəbər verir ki, Qalibaf bu barədə sosial şəbəkə hesabında paylaşım edib.

Onun sözlərinə görə, ABŞ memorandumun əsas müddəalarını dəfələrlə pozub.

"ABŞ tərəfindən memorandumun əsas pozuntuları bunlardır: Hörmüz boğazı ilə bağlı İranın həyata keçirdiyi dəyişikliklərin pozulması, yeni zərbələrlə bağlı davamlı təhdidlər, neftlə əlaqədar sanksiyaların yenidən tətbiq olunması, İranın cənubuna endirilən hücumlar, Livanda sionist təcavüzün davam etdirilməsi. Təzyiq və şantaj dövrü başa çatıb. Bu yol heç bir nəticə verməyəcək. Biz təslim olmayacağıq", – deyə İran parlamentinin sədri bildirib.

Xatırladaq ki, ABŞ son günlər İran ərazisində onlarla hədəfə zərbələr endirib və İran neftinə qarşı sanksiyaları yenidən qüvvəyə mindirib.

Vaşinqton bəyan edib ki, bu addımlar İranın Hörmüz boğazı yaxınlığında hərəkət edən kommersiya gəmilərinə həyata keçirdiyi hücumlara cavab olaraq atılıb.