Donald Tramp: İran danışıqlara qayıtmasa, gələn həftə körpülərə və elektrik stansiyalarına zərbələr endirəcəyik

ABŞ Prezidenti Donald Tramp bəyan edib ki, Tehran danışıqlar masasına qayıtmayacağı təqdirdə ABŞ gələn həftə İranda körpüləri və elektrik stansiyalarını hədəfə alacaq.

InterPress.ge xəbər verir ki, Tramp bu barədə Fox News telekanalına müsahibəsində danışıb.

"Sabah axşam onlara çox güclü zərbə endirəcəyik. Növbəti gecə də çox güclü zərbə planlaşdırırıq. Gələn həftə isə onlar üçün çox pis olacaq, çünki növbə elektrik stansiyalarına çatacaq. Gələn həftə körpülərin də növbəsi gələcək. Danışıqlar masasına əyləşib danışıqlara başlamasalar, onların bütün elektrik stansiyalarını və bütün körpülərini məhv edəcəyik", – deyə Tramp bildirib.

ABŞ Prezidenti qeyd edib ki, qarşılıqlı anlaşma memorandumunun pozulmasından sonra artıq dördüncü gündür davam edən İrana zərbələr onun "artıq kifayətdir" deyəcəyi vaxta qədər davam edəcək.

Tramp eyni zamanda ABŞ-ın İrana quru qoşunları göndərməsi ehtimalını da istisna etməyib, lakin bunun arzuolunan variant olmadığını vurğulayıb.

"Bəzən quru əməliyyatı zəruri olur. Amma mən bunu etmək istəmirəm. Bizim əvəzimizə bu quru əməliyyatını həyata keçirəcək başqaları var", – deyə ABŞ Prezidenti bildirib.

Lakin Donald Tramp hansı ölkələrin bu məqsədlə qoşun göndərməsinin nəzərdə tutulduğunu açıqlamayıb.