İran: Hörmüz boğazı neftə tətbiq edilən sanksiyalar ləğv olunana qədər açılmayacaq

İran parlamentinin spikeri Məhəmməd Baqer Qalibaf Hörmüz boğazının neftə tətbiq edilən sanksiyalar aradan qaldırılana qədər bağlı qalacağını bildirib.

InterPress.ge xəbər verir ki, Qalibafın sözlərinə görə, İran ABŞ-ın qarşılıqlı anlaşma memorandumu çərçivəsində üzərinə götürdüyü öhdəlikləri yerinə yetirənədək Hörmüz boğazını açmayacaq.

“Hörmüz boğazı blokada aradan qaldırılana, dondurulmuş aktivlər azad edilənə, sanksiyalar ləğv olunana və bütün cəbhələrdə hərbi əməliyyatlar və təhdidlər başa çatana qədər açılmayacaq”, – deyə İran parlamentinin spikeri bildirib.

Qalibaf həmçinin İranın qarşı tərəfə daha ağır məğlubiyyət yaşatmağa hazır olduğunu deyib.

“Güman etdiyimiz kimi, müharibənin başa çatması ilə bağlı razılaşmanı çıxılmaz vəziyyətə düşdüyü üçün qəbul edən düşmən siyasi məğlubiyyətini kompensasiya etmək məqsədilə üzərinə götürdüyü öhdəlikləri qısa müddət sonra pozdu”, – deyə Qalibaf bildirib.