Givi Mikanadze: Birinci, yeddinci və onuncu sinif dərslikləri sentyabrın 14-dək bütün məktəblərə paylanacaq
Gürcüstanda birinci, yeddinci və onuncu siniflər üçün yeni dərsliklərin çap prosesi yekunlaşmaq üzrədir və bütün məktəblərə kitabların sentyabrın 14-dək çatdırılması planlaşdırılır.
InterPress.ge xəbər verir ki, bunu Gürcüstanın Təhsil, Elm və Gənclər naziri Givi Mikanadze bildirib.
Nazirin sözlərinə görə, birinci, yeddinci və onuncu sinif şagirdləri humanitar və STEM istiqamətləri üzrə tamamilə yenilənmiş dərsliklərlə təmin olunacaqlar. Yeni sistemə əsasən, dövlət və özəl məktəblərdə eyni standartda olan vahid dərsliklərdən istifadə ediləcək.
“Çap, çatdırılma və sonrakı paylanma qrafiki ətraflı şəkildə hazırlanıb. Sentyabrın 14-dək bütün məktəblərdə bütün dərsliklər paylanmış olacaq. Birinci, yeddinci və onuncu siniflərdə uşaqlar tamamilə yeni dərsliklər əldə edəcəklər”, – deyə Mikanadze bildirib.
Nazir qeyd edib ki, dövlət məktəblərində dərsliklər ənənəvi olaraq şagirdlərə pulsuz təqdim ediləcək. Özəl məktəblər isə kitabları “Saganmanatleblo Resursebi” MMC-dən əldə edəcəklər.
Mikanadzenin sözlərinə görə, məqsəd 2028-ci ilin sonunadək bütün siniflər üzrə, bütün humanitar və STEM fənlərində dərslikləri tamamilə yeniləmək və vahid standartda olan kitablarla əvəzləməkdir.
Nazir həmçinin repetitorium proqramı ilə bağlı hazırlıq işlərinin başladığını bildirib. Onun sözlərinə görə, proqram üçün istifadə ediləcək xüsusi dərsliklərin hazırlanması istiqamətində intensiv iş aparılır.
Yaxın müddətdə repetitoriumda çalışacaq müəllimlərin seçilməsi, onların hazırlanması və ixtisasartırma prosesinin həyata keçirilməsi planlaşdırılır. Proqramın 2027-2028-ci tədris ilinin əvvəlində rəsmi şəkildə fəaliyyətə başlaması gözlənilir.
Mikanadze bildirib ki, repetitoriumda 29 nəfərlik böyük qruplar olmayacaq. Qrupların sayının ən azı iki dəfə azaldılması, mümkün olduğu halda isə 10 nəfərlik qrupların yaradılması nəzərdə tutulur.
Şagirdlər milli imtahanlarda verməli olduqları 3-4 fənn üzrə il ərzində hazırlıq keçəcəklər. Nazir bunun milli imtahan proqramının tələbləri ilə tam uyğunlaşdırılacağını vurğulayıb.
“Bizim məqsədimiz uşağın məktəbi elə bitirməsidir ki, milli imtahanların keçid baryerini rahatlıqla aşa və müvafiq universitetdə yer əldə edə bilsin”, – deyə Mikanadze bildirib.
