Marko Rubio: “Hazırda ABŞ-ın İrana qarşı yeni zərbələr endirməsi gözlənilmir”

ABŞ dövlət katibi Marko Rubio son günlər bir neçə xarici həmkarına bildirib ki, hazırda ABŞ tərəfindən İrana qarşı yeni hərbi zərbələrin endirilməsi gözlənilmir.

InterPress.ge xəbər verir ki, “Axios” məlumatlı mənbələrə istinadən yazır ki, Rubio hücumlar əvəzinə İrana təzyiqin digər vasitələrindən istifadə edilməsinə diqqət yetirildiyini bildirib. Bu vasitələr arasında bu həftə elan edilən yeni sanksiya təşəbbüsü də var.

Mənbələrin məlumatına görə, Rubio bir neçə həmkarı ilə telefon danışığında Tramp administrasiyasının İranla bağlı hazırkı siyasətini açıqlayıb.

Bu siyasət hazırda İrana qarşı hərbi əməliyyatlardan çəkinməyi, ABŞ-ın dəniz blokadası və Maliyyə Nazirliyinin yeni sanksiyaları vasitəsilə Tehrana iqtisadi təzyiqin artırılmasını, həmçinin Hörmüz boğazından mümkün qədər çox neftin daşınmasını və qlobal enerji bazarlarına çıxarılmasını nəzərdə tutur.

ABŞ rəsmiləri bildirirlər ki, Hörmüz boğazının böyük hissəsinin minalardan təmizlənməsi və son həftələrdə boğazın cənub hissəsində hərəkət edən tankerlərin sayının artması İranın qlobal enerji bazarlarına təsir imkanlarını əhəmiyyətli dərəcədə azaldıb.

“İranlılar boğaza nəzarəti itiriblər. Hazırda boğaza ABŞ nəzarət edir”, – deyə amerikalı rəsmilərdən biri bildirib.

Rəsmilər həmçinin qeyd edirlər ki, ABŞ-ın tətbiq etdiyi dəniz blokadası İranı mühüm gəlir mənbəyindən məhrum edir.

Məlumata görə, son iki həftə ərzində İranın əsas neft ixrac mərkəzi olan Xark adası yaxınlığında tankerlərin hərəkəti demək olar ki, müşahidə edilməyib.