İran İnqilab Keşikçiləri Korpusu Trampın bəyanatına cavab verib

İran İslam İnqilabı Keşikçiləri Korpusu ABŞ Prezidenti Donald Trampın BMT Baş Assambleyasında səsləndirdiyi bəyanata münasibət bildirib və Vaşinqtonun bu cür addımlarla “məğlubiyyətdən başqa heç nə əldə etməyəcəyini” açıqlayıb.

InterPress.ge xəbər verir ki, İran İslam İnqilabı Keşikçiləri Korpusunun sözçüsü Hüseyn Möhebi Trampın daha əvvəl də hədələr səsləndirdiyini, lakin onları həyata keçirə bilmədiyini bildirib.

“Tramp unudur ki, bundan əvvəl də hədələr səsləndirib, lakin bu hədələri həyata keçirə bilməyib. İndi isə yenidən yeni hədələr səsləndirir”, – deyə Hüseyn Möhebi bildirib.

İran Silahlı Qüvvələrinin Baş Qərargahı da bəyanat yayaraq ABŞ tərəfindən “əsassız ittihamların və hədələrin” təkrarlanmasının güc nümayişi kimi qəbul edilməməli olduğunu vurğulayıb. İran Baş Qərargahının açıqlamasına görə, Tehran daha sərt, dağıdıcı və proqnozlaşdırılması mümkün olmayan zərbələr endirəcək.

Bununla yanaşı, İran parlamentinin spikeri Məhəmməd Baqer Qalibaf ABŞ-ın təzyiqlərinə baxmayaraq, İranın təslim olmayacağını və fəaliyyətini dayandırmayacağını bildirib.

“Heç vaxt təslim olmayacağıq və ölkəni dayandırmayacağıq. Güc tətbiq etməklə cavab verəcəyik – indiyədək etdiyimiz kimi. Bununla da düşməni bütün sahələrdə fəaliyyətsiz vəziyyətə gətirmişik”, – deyə Qalibaf bildirib.

Qeyd edək ki, ABŞ Prezidenti Donald Tramp BMT Baş Assambleyasında çıxışı zamanı İranla bağlı “mühüm qərar” verməli olduğunu bildirib. Onun sözlərinə görə, aralıq seçkilərdən sonra İranla razılaşma əldə etmək və ya İranı məhv etmək arasında seçim etməlidir.

“İranla elə bir razılaşma əldə edəcəyikmi ki, bu, onlara əvvəllər olduğundan daha güclü dövlət qurmağa və bərpa etməyə imkan versin – bəlkə də Yaxın Şərqdə, hətta bütün dünyada ən böyük dövlətlərdən birinə çevrilsin? Yoxsa İslam Respublikasını məhv edim və bunu sürətlə həyata keçirərək onların bir daha insanları öldürmək və ölkələri məhv etmək imkanının qarşısını alım? Onları heç bir xilas şansı, gələcək böyüklük və ya gələcək nəsillər üçün ümid qoymadan cəhənnəmə göndərim?” – deyə Tramp bildirib.