Moldovada 5 saxta çağrı mərkəzi ləğv edilib, aralarında Gürcüstan vətəndaşıda olmaqla 8 nəfər saxlanılıb

Moldovanın paytaxtı Kişinyovda hüquq-mühafizə orqanları 21 yerdə axtarış aparıb və beş dələduzluq çağrı mərkəzinin fəaliyyətini dayandırıb.

InterPress.ge xəbər verir ki, bu barədə media məlumat yayıb.

Məlumata görə, çağrı mərkəzləri ABŞ və Kanada vətəndaşlarından kriptovalyutaya investisiya yatırmaq bəhanəsi ilə pul alıblar. Dələduzluq və çirkli pulların yuyulması işi üzrə səkkiz nəfər saxlanılıb.

Genişmiqyaslı əməliyyat oktyabrın 9-da Milli İstintaq Müfəttişliyinin və Balti polisi əməkdaşlarının iştirakı, “Fulger” xüsusi təyinatlı dəstəsinin dəstəyi ilə keçirilib.

Müstəntiqlərin sözlərinə görə, mütəşəkkil cinayətkar qrupun üzvləri rəqəmsal aktivlərlə ticarət üçün saxta platformalar yaradıblar. Şübhəlilər özlərini beynəlxalq investisiya mütəxəssisləri kimi təqdim edib, müştəriləri real gəlirləri barədə aldadaraq onları böyük məbləğdə pul köçürməyə inandırıblar.

Şübhəlilər çağrı mərkəzlərində işləmək üçün Kamerun, Hindistan, İsrail, Nigeriya, Gürcüstan və Ukrayna vətəndaşları da daxil olmaqla onlarla şəxsi işə götürüblər. Onlar Miqrasiya Baş Müfəttişliyi və Beynəlxalq Polis Əməkdaşlığı İdarəsinin əməkdaşları tərəfindən yoxlanılacaqlar.

Axtarışlar zamanı hüquq-mühafizə orqanları nağd pul, mobil telefonlar, kompüter avadanlıqları, bank kartları, sənədlər, möhürlər və rabitəni bloklayan qurğular aşkar edərək götürüblər. Bundan əlavə, obyektlərdən birində təşkilatçıların işə götürdükləri əməkdaşları yoxlamaq üçün istifadə etdikləri yalan detektoru da tapılıb.

Hüquq-mühafizə orqanlarının məlumatına görə, bu cinayət fəaliyyəti təşkilatçılara böyük gəlir gətirib. İlkin istintaq məlumatlarına əsasən, beş çağrı mərkəzindən yalnız biri ayda təxminən 2 milyon dollar gəlir əldə edib.

Saxlanılan səkkiz nəfərin hamısı istintaq təcridxanasına yerləşdirilib. İstintaq davam edir.