Aİ Gürcüstanda yerli icmalar üçün 38 milyon avro haqda açıqlama yayıb 

Avropa İttifaqı Gürcüstanda ailələrə və yerli icmalara fayda verəcək layihələrin həyata keçirilməsi üçün 38 milyon avro ayırıb. Maliyyə dəstəyi çərçivəsində fermerlərə, kənd sakinlərinə, kiçik və orta bizneslərə, eləcə də qadınlara və qızlara xüsusi diqqət yetiriləcək.

InterPress.ge xəbər verir ki, bu barədə Avropa İttifaqının Gürcüstandakı nümayəndəliyinin Aİ ilə əməkdaşlıq bölməsinin rəhbəri Nikolas Sendroviç yerli icmalar üçün nəzərdə tutulan yeni maliyyə dəstəyi paketi haqqında danışarkən bildirib.

Onun sözlərinə görə, bu təşəbbüs Aİ-nin “Avropa İttifaqı səninlədir” yanaşmasının bir hissəsidir və Gürcüstanın Avropa və demokratik gələcəyinə sadiqliyini əks etdirir.

Dəstəkdən ən çox kimin faydalanacağı ilə bağlı suala cavab verən Nikolas Sendroviç bildirib ki, paketin əsas istiqamətlərindən biri fermerlərin, kənd yerlərində yaşayan insanların, eləcə də kiçik və orta bizneslərin dəstəklənməsidir.

“Xüsusi diqqəti qadınların idarə etdiyi bizneslərə və fermer təsərrüfatlarına yönəldəcəyik. Həmçinin ölkə üzrə qəsəbə və kiçik şəhərlərdə peşə bacarıqlarının inkişafına və yeni imkanların yaradılmasına dəstək verəcəyik. Ölkəyə qayıdan və burada yenidən məskunlaşmaq istəyən insanlara da kömək edirik.

Bundan əlavə, qadınlara və qızlara əhəmiyyətli dəstək göstərəcək, onlar üçün yeni imkanlar yaradacağıq. Bu, gender əsaslı zorakılığa məruz qalmış qadın və qızlara da aiddir”, – deyə Sendroviç bildirib.

Dəstəyin necə həyata keçiriləcəyi barədə danışan Aİ rəsmisi qeyd edib ki, yardımın əhaliyə mümkün qədər tez çatdırılması üçün etibarlı tərəfdaşlarla əməkdaşlıq ediləcək.

“Avropa İttifaqına üzv dövlətlərin müvafiq qurumları və BMT agentlikləri də daxil olmaqla, etibarlı tərəfdaşlarımızla əməkdaşlıq edəcəyik ki, Gürcüstan əhalisinə yardımı mümkün qədər tez çatdıraq. Bu dəstək Gürcüstan vətəndaşları üçün gələn ilin əvvəlindən etibarən dəyişikliklər yaradacaq”, – deyə o bildirib.

Sendroviçin sözlərinə görə, Avropa İttifaqı Gürcüstanla əməkdaşlığının 30 ildən artıq davam etdiyi müddətdə ölkəyə 2 milyard avrodan çox yardım göstərib.

“Yalnız son beş il ərzində 280 min kiçik və orta müəssisəyə dəstək vermişik. Bu, 38 min iş yerinin yaradılmasına kömək edib.

Xüsusilə qürur duyduğumuz digər layihə Xaşuri və ətraf bələdiyyələrin içməli su ilə təmin olunması ilə bağlıdır. Bu təşəbbüsdən həmin ərazidə 44 min insan faydalanıb.

Qeyd etmək lazımdır ki, dəstəyimizin əhəmiyyətli hissəsi Şərq-Qərb magistralı istiqamətində həyata keçirilir. Yəqin ki, Avropa İnvestisiya Bankı vasitəsilə göstərilən Aİ yardımı sayəsində Tbilisidən Batumiyə səfər müddətinin nəzərəçarpacaq dərəcədə azaldığını müşahidə etmisiniz. Bundan əlavə, ölkəni havanın keyfiyyətinə nəzarət edən 10 monitorinq stansiyası ilə təmin edirik”, – deyə o qeyd edib.

Gürcüstan əhalisinə ölkənin Avropa gələcəyi ilə bağlı mesajının nə olduğu barədə suala cavab verən Nikolas Sendroviç bildirib ki, bir çox gürcü Aİ-nin ölkədə daha fəal iştirakını görmək istəyir və eyni zamanda, Gürcüstanın özünəməxsus xüsusiyyətlərini Avropaya təqdim etməyə çalışır.

“Bilirəm ki, bir çox gürcü bu ölkədə Avropa İttifaqının daha fəal olmasını istəyir. Bununla yanaşı, onlar Aİ-yə bu ölkəni unikal və xüsusi edən xüsusiyyətləri təqdim etmək istəyirlər. Əslində, bu iki kimlik arasında heç bir ziddiyyət yoxdur. Gürcü, yoxsa avropalı olduğunuzu seçməyə məcbur deyilsiniz. Əslində, bu ölkənin əhalisi artıq həm gürcü, həm də avropalıdır”, – deyə Sendroviç bildirib.