Mariya Zaxarova: Səudiyyə Ərəbistanında keçirilən danışıqları Rusiya və ABŞ müsbət qiymətləndirir
Səudiyyə Ərəbistanında ABŞ və Rusiya nümayəndə heyətləri arasında keçirilən danışıqlar hər iki tərəf tərəfindən müsbət və konstruktiv qiymətləndirilib.
InterPress.ge xəbər verir ki, bu barədə Rusiya Xarici İşlər Nazirliyinin sözçüsü Mariya Zaxarova açıqlama verib.
“Ən vacib məqam odur ki, bu görüş baş tutdu və hər iki tərəf onu müsbət və konstruktiv tonda dəyərləndirir,” – deyə Zaxarova bildirib.
Onun sözlərinə görə, bu, adi görüş deyildi, çünki son üç il ərzində Rusiya və ABŞ arasında rəsmi diplomatik təmaslar olmamışdı.
“Təsəvvür edin ki, BMT Təhlükəsizlik Şurasının daimi üzvləri olan, qlobal miqyasda mühüm rol oynayan və ortaq problemləri, məsələləri olan iki ölkə arasında əlaqə olmayıb. Çünki əvvəlki ABŞ administrasiyası bu dialoqu tamamilə bloklamışdı,” – deyə Zaxarova əlavə edib.
Xatırladaq ki, dünən Ər-Riyadda ABŞ və Rusiya nümayəndə heyətləri arasında yüksək səviyyəli danışıqlar keçirilib.
ABŞ Dövlət Departamentinin məlumatına görə, dövlət katibi Marko Rubio və Rusiya xarici işlər naziri Sergey Lavrov yüksək səviyyəli komandaların yaradılması barədə razılığa gəliblər. Bu komandalar Ukrayna münaqişəsinin uzunmüddətli, dayanıqlı və bütün tərəflər üçün məqbul şəkildə həlli üzərində işləyəcəklər.
Bundan əlavə, tərəflər gələcək əməkdaşlıq üçün geosiyasi maraqlar və Ukrayna münaqişəsinin həllindən sonra yarana biləcək iqtisadi və investisiya imkanları ilə bağlı dialoqun əsasını qoymağa razılaşıblar.
