Avropa İttifaqı Gürcüstanda dezinformasiyanı və Aİ səfirinə qarşı hücumları qətiyyətlə pisləyir
Avropa İttifaqı Gürcüstanda keçirilmiş yerli özünüidarəetmə seçkiləri ilə bağlı yayılan dezinformasiyanı və Aİ səfirinə qarşı yönəlmiş şəxsi hücumları qətiyyətlə pisləyib. Bu barədə Avropa İttifaqının ali nümayəndəsi və Avropa Komissiyasının vitse-prezidenti Kaya Kallasın və genişlənmə məsələləri üzrə komissar Marta Kosin birgə bəyanatında qeyd olunur.
Bəyanatda vurğulanır ki, Gürcüstanda yerli seçkilər bu şənbə günü fikir müxtəlifliyinin genişmiqyaslı boğulması şəraitində keçirilib.
Aİ rəsmiləri seçkilərdən sonrakı dövrdə ölkədə sakitliyin və təmkinin qorunmasına çağırıb, bütün siyasi qüvvələr və vətəndaş cəmiyyəti nümayəndələrinin iştirakı ilə inklüziv və konstruktiv dialoqun vacibliyini qeyd ediblər.
“Gürcüstanda yerli özünüidarəetmə seçkiləri fikir müxtəlifliyinin sıxışdırıldığı bir şəraitdə baş tutdu. Müstəqil mediaya qarşı çoxaylıq hücumlar, vətəndaş cəmiyyətinə qarşı qəbul edilmiş qanunlar, müxalifətçilərin və fəalların həbsi, eləcə də seçki məcəlləsinə hakim partiyanın xeyrinə edilən dəyişikliklər rəqabətli seçkilərin keçirilməsini ciddi şəkildə məhdudlaşdırdı,” – deyə bəyanatda bildirilir.
Aİ nümayəndələrinin sözlərinə görə, müxalifətin böyük hissəsi seçkiləri boykot edib və seçici fəallığı nisbətən aşağı olub.
Bəyanatda həmçinin qeyd olunur ki, Gürcüstan hökumətinin beynəlxalq müşahidəçiləri, xüsusilə ATƏT/ODİHR missiyasını vaxtında dəvət etməməsi seçki prosesinin şəffaflığına zərbə vurub və beynəlxalq monitorinqin etibarlılığına maneə yaradıb. Yerli təşkilatların da repressiv mühit səbəbindən müşahidədən imtina etdiyi bildirilir.
Aİ rəsmiləri vurğulayıblar ki, “Gürcü xalqının böyük bir hissəsi ‘Gürcü Arzusu’ partiyasının repressiv siyasətinə qarşı etirazını davam etdirib” və əsassız şəkildə saxlanılan bütün şəxslərin azad olunmasına çağırıblar.
“Seçkilərdən sonrakı dövrdə sükunət və təmkin qorunmalıdır. Hakimiyyət vətəndaşların toplaşmaq və ifadə azadlığını təmin etməlidir. Ən vacib məsələ — bütün siyasi qüvvələrin və vətəndaş cəmiyyəti nümayəndələrinin iştirakı ilə konstruktiv dialoqun başlamasıdır. Biz bütün tərəfləri zorakılıqdan çəkinməyə çağırırıq,” – deyə Avropa İttifaqının bəyanatında qeyd olunur.
