DTX: Yeddi cinayət işi üzrə korrupsiya faktları aşkarlanıb, 21 nəfər saxlanılıb
Yeddi ayrı-ayrı cinayət işi üzrə aşkar edilmiş korrupsiya cinayətləri ilə bağlı ümumilikdə 21 nəfər saxlanılıb və cinayət məsuliyyətinə cəlb olunub.
InterPress.ge xəbər verir ki, bu barədə Dövlət Təhlükəsizliyi Xidmətinin Antikorrupsiya Agentliyinin rəhbəri Emzar Qaqnidze brifinqdə məlumat verib.
DTX-da bildirilib ki, əksər hallarda söhbət hərbi xidmətə çağırışın təxirə salınması məqsədilə sağlamlıq haqqında saxta arayışların və digər saxta tibbi sənədlərin hazırlanmasından gedir. Qurumun məlumatına görə, saxlanılanlar arasında həkimlər və tibb bacıları da var.
DTX-nın Antikorrupsiya Agentliyinin əməkdaşları tərəfindən bu gün Gürcüstanın müxtəlif regionlarında keçirilmiş genişmiqyaslı antikorrupsiya tədbirləri nəticəsində yeddi ayrı cinayət işi üzrə korrupsiya faktları aşkarlanıb və 21 nəfər saxlanılıb.
Birinci iş üzrə Müdafiə Nazirliyinin Baş İnspeksiyası və prokurorluqla birgə keçirilmiş əməliyyat tədbirləri çərçivəsində Tbilisidə rüşvət alma, rüşvət almağa yardım etmə və vəzifə saxtakarlığı faktları üzrə Qaçqınların, Əmək, Səhiyyə və Sosial Müdafiə Nazirliyinin “Psixi Sağlamlıq və Narkomaniyanın Qarşısının Alınması Mərkəzi” MMC-nin həkim-psixiatrı və həmin mərkəzin təhlükəsizlik əməkdaşı saxlanılıb. İstintaqla müəyyən edilib ki, həkim-psixiatr çağırışçının hərbi xidmətdən yayınması məqsədilə təhlükəsizlik əməkdaşının köməyi ilə rüşvət müqabilində saxta tibbi diaqnoz qoyub və yalan məlumatları əks etdirən tibbi arayış hazırlayıb. Fakt üzrə Gürcüstan Cinayət Məcəlləsinin müvafiq maddələri ilə istintaq aparılır və 6 ildən 9 ilədək azadlıqdan məhrumetmə cəzası nəzərdə tutulur.
İkinci iş üzrə qabaqcadan əlbir olan qrup tərəfindən dələduzluq faktına görə bir nəfər saxlanılıb, bir nəfərə isə ittiham irəli sürülüb. İstintaqla müəyyən edilib ki, təqsirləndirilən şəxslər guya hərbi-tibbi komissiya üzvünün köməyi ilə sağlamlıq vəziyyətinin müvəqqəti uyğunsuzluğu əsasında hərbi xidmətə çağırışın təxirə salınacağını vəd ediblər. Bunun qarşılığında vətəndaşdan 10 min lari tələb olunub və əvvəlcədən 5 min lari alınıb, lakin real yardım göstərilməyib və vəsait dələduzluq yolu ilə mənimsənilib. Fakt üzrə 4 ildən 7 ilədək azadlıqdan məhrumetmə cəzası nəzərdə tutulur.
Üçüncü cinayət işi üzrə vəzifə səlahiyyətlərindən sui-istifadə, vəzifə saxtakarlığı, rəsmi sənədlərin dəfələrlə saxtalaşdırılması, satılması və istifadəsi faktları ilə əlaqədar Kareli bələdiyyəsinin Hərbi Qeydiyyat və Çağırış Xidmətinin keçmiş rəisi və “Bermuxi” MMC-nin faktiki rəhbəri məsuliyyətə cəlb olunub. İstintaqla müəyyən edilib ki, keçmiş vəzifəli şəxs komissiyaların qərarları olmadan tibbi rəy və sənədləri saxtalaşdıraraq altı çağırışçını alternativ əmək xidmətinə yönləndirib, onların bir qismi “Bermuxi” MMC-də qeyri-hərbi alternativ əmək xidməti keçirmiş kimi rəsmiləşdirilib. Həmin dövrdə çağırışçıların bir hissəsinin ölkə xaricində olduğu da aşkarlanıb. Bu iş üzrə 3 ildən 6 ilədək azadlıqdan məhrumetmə cəzası nəzərdə tutulur.
Dördüncü iş üzrə qrup halında kommersiya rüşvəti və saxta rəsmi sənədlərin hazırlanması və satılması faktlarına görə “Krol Medical Corporation” MMC və “Tbilisi Mərkəzi Xəstəxanası” MMC-nin dörd həkimi cinayət məsuliyyətinə cəlb edilib. Müəyyən edilib ki, tibb işçiləri 315 vətəndaşa sağlamlıq vəziyyəti barədə saxta arayışlar və digər tibbi sənədlər hazırlayıb, bu məlumatları müvafiq elektron bazaya yerləşdiriblər. Nəticədə vətəndaşlara qanunsuz olaraq əlillik statusu verilib və dövlət pensiyası təyin olunub. İndiyədək 107 nəfər dindirilib və onlar saxta sənədlər əsasında pensiya aldıqlarını təsdiqləyiblər. Bu faktlar üzrə 4 ildən 6 ilədək azadlıqdan məhrumetmə cəzası nəzərdə tutulur.
Beşinci cinayət işi üzrə külli miqdarda dələduzluq, dələduzluğa yardım və saxta rəsmi sənədlərin hazırlanması və istifadəsi faktları ilə əlaqədar “Elmaris” MMC-nin nümayəndəsi, “Tegika Universal” MMC-nin direktoru və “Expert Service” MMC-nin eksperti ittiham olunub. İstintaqla müəyyən edilib ki, Çoxatauri bələdiyyəsinin Xidistavi kəndində yerləşən futbol meydançasının bərpası zamanı dələduzluq yolu ilə bələdiyyəyə məxsus 19 090 lari mənimsənilib. Bu iş üzrə 6 ildən 9 ilədək azadlıqdan məhrumetmə cəzası nəzərdə tutulur.
Altıncı iş üzrə qabaqcadan əlbir olan qrup tərəfindən külli miqdarda dələduzluq və saxta rəsmi sənədlərin hazırlanması və istifadəsi faktları ilə əlaqədar “Euro Gzebi” MMC-nin direktoru və mühasibi, “Biltmori” MMC-nin direktoru və “Expert House” MMC-nin keçmiş nəzarətçisi ittiham olunub. Müəyyən edilib ki, Gurcaani bələdiyyəsi ilə bağlanmış müqavilə çərçivəsində yolun bərpası işlərində faktiki görülən işlərlə sənədlərdə göstərilən işlər arasında 38 158 lari fərq yaranıb və bu vəsait dələduzluq yolu ilə mənimsənilib. Bu fakt üzrə 6 ildən 9 ilədək azadlıqdan məhrumetmə cəzası nəzərdə tutulur.
Yeddinci iş üzrə vəzifə səlahiyyətlərindən istifadə etməklə külli miqdarda dələduzluq, vəzifə saxtakarlığı və saxta rəsmi sənədlərin hazırlanması və istifadəsi faktlarına görə Gurcaani bələdiyyəsinin əməkdaşı, bələdiyyə başçısının Gurcaanidəki nümayəndəsi və iki vətəndaş məsuliyyətə cəlb edilib. İstintaqla müəyyən edilib ki, Gurcaanidə Q. Leonidze küçəsində yerləşən 3 900 kvadratmetr torpaq sahəsi saxta sənədlər əsasında qanunsuz olaraq qeydiyyata alınıb və nəticədə dövlətə 70 200 lari ziyan dəyib. Bu fakt üzrə də 6 ildən 9 ilədək azadlıqdan məhrumetmə cəzası nəzərdə tutulur.
Qeyd olunan cinayətlərlə bağlı istintaq çərçivəsində məhkəmə qərarları əsasında gizli istintaq tədbirləri həyata keçirilib və cinayət əməllərini təsdiqləyən audio və video sübutlar əldə olunub.
DTX-da bildirilib ki, Antikorrupsiya Agentliyi korrupsiya cinayətlərinin aşkar edilməsi və qarşısının alınması istiqamətində fəaliyyətini davam etdirir.
