Milli Bank yeddi valyuta dəyişmə məntəqəsini 92 min lari məbləğində cərimələyib
Cari ilin 27 yanvar tarixində Gürcüstanın Milli Bankı valyuta dəyişmə fəaliyyəti ilə məşğul olan yeddi məntəqəni cərimələyib.
InterPress.ge xəbər verir ki, nəzarət orqanı tərəfindən həmin obyektlərə ümumilikdə 92 min lari məbləğində cərimə tətbiq olunub.
Milli Bankın məlumatına görə, cərimələrin tətbiqinə səbəb “Pulların yuyulmasına və terrorizmin maliyyələşdirilməsinin qarşısının alınmasına yardım haqqında” Gürcüstan qanununun 29-cu maddəsinin birinci və ikinci bəndlərində nəzərdə tutulan tələblərin yerinə yetirilməməsi olub.
Bildirilib ki, valyuta dəyişmə məntəqələri pulların yuyulması və terrorizmin maliyyələşdirilməsinin qarşısının alınması məqsədilə daxili nəzarət və monitorinq öhdəliklərini lazımi səviyyədə təmin etməyib. Xüsusilə proqram təminatında (elektron sistemlərdə) mövcud olan çatışmazlıqlar səbəbindən şübhəli, qeyri-adi və ya parçalanmış əməliyyatların aşkarlanması, eləcə də müştərilərin – fiziki və hüquqi şəxslərin – sanksiyaya məruz qalan və siyasi cəhətdən fəal şəxslər siyahılarında tam yoxlanılması mümkün olmayıb.
Eyni zamanda, bəzi subyektlərdə pulların yuyulması və terrorizmin maliyyələşdirilməsinin qarşısının alınması üzrə öhdəliklərin icrası üçün zəruri olan daxili təlimatların mövcud olmadığı qeyd olunub. Maliyyə Monitorinqi Xidmətinə ilkin uçot formalarının müəyyən edilmiş müddətlərdə təqdim edilməməsi informasiya mübadiləsi qaydalarının pozulmasına səbəb olub. Bundan əlavə, Milli Banka təqdim edilən risk nəzarəti hesabatlarında, o cümlədən təkrar hallarda, yanlış məlumatların verildiyi aşkarlanıb.
Cərimələnən subyektlərin siyahısı belədir: “Ramazi” MMC – 6 000 lari; “Likuna” MMC – 16 000 lari; fərdi sahibkar Dimitri Kurtsikaşvili – 13 000 lari; fərdi sahibkar Qoça Bolkvadze – 13 000 lari; fərdi sahibkar Levan Mexrişvili – 13 000 lari; fərdi sahibkar Nino Morbedadze – 15 000 lari; fərdi sahibkar Quram Qasviani – 16 000 lari.
