Gürcüstanda hava şəraiti pisləşəcək-PROQNOZ
18 fevral günün ikinci yarısından 19 fevral günün sonunadək Gürcüstanda yağış şəklində yağıntılar, bəzi yerlərdə güclü yağış gözlənilir. Qərb küləyi güclənəcək, dənizdə isə 4–6 bala qədər fırtına proqnozlaşdırılır
InterPress.ge xəbər verir ki, bu barədə Milli Ətraf Mühit Agentliyi məlumat yayıb.
Məlumata əsasən, ölkənin yüksək dağlıq rayonlarında qar, bəzi yerlərdə güclü qar, duman, çovğun və qar uçqunu təhlükəsi gözlənilir.
Bildirilib ki, güclü qar, çovğun, görünüş məsafəsinin azalması, buzlanma və uçqun təhlükəsi səbəbindən avtomobil yollarının ayrı-ayrı hissələrində nəqliyyatın hərəkəti məhdudlaşdırıla bilər.
Eyni zamanda, intensiv yağıntılar Gürcüstan çaylarında su səviyyəsinin əhəmiyyətli artımına, Qərbi Gürcüstanın kiçik çaylarında daşqınlara, təpəlik və dağlıq ərazilərdə isə sürüşmə və sel proseslərinin yaranması və aktivləşməsinə səbəb ola bilər. Təhlükə səviyyəsi orta qiymətləndirilir.
