Sosial müavinət alan ailələr üçün prioritet yoxlama meyarları müəyyənləşib

"Sosial müdafiə alan ailələrin yenidən yoxlanılması üçün bütün zəruri şərtlər hazırlanıb və qarşıdakı aylarda ailələr nazirliyin müəyyən etdiyi proqram əsasında mərhələli şəkildə yoxlanılacaq."

InterPress.ge xəbər verir ki, bu barədə səhiyyə naziri Mixeil Sarjveladze brifinqdə məlumat verib.

Nazirin sözlərinə görə, prioritet olaraq sosial yardım almaq üçün müəyyən edilmiş tələblərə cavab verməmək ehtimalı yüksək olan ailələr yoxlanılacaq. O qeyd edib ki, məsələn, son üç ay ərzində hər ay 2 000 lari gəlir əldə edilməsi belə əsaslardan biri kimi nəzərdə tutulur.

Sarjveladze vurğulayıb ki, ailənin vəziyyətində müsbət dinamika varsa, gəlirləri artıbsa və sosial-iqtisadi durumu yaxşılaşıbsa, həmin ailə artıq bazada qalmamalıdır.

Nazirin izahına görə, ailənin sosial vəziyyətinin qiymətləndirilməsi üçün onlarla meyar mövcuddur. Kommunal ödənişlərin həcmi, gəlir səviyyəsi, sağlamlıq vəziyyəti, əlillik statusu və digər amillər ümumi qiymətləndirməyə təsir edir. Heç bir ayrıca göstərici yekun qərar üçün əsas sayılmır.

O bildirib ki, 2 000 lari gəlir avtomatik olaraq statusun ləğvi demək deyil, bu, sadəcə ailənin yenidən yoxlanılması üçün əsasdır. Yoxlamanın nəticəsində bütün meyarlar üzrə ümumi qiymətləndirmə aparılacaq və ailə ya bazada qalaraq müavinət almağa davam edəcək, ya da bal göstəricisi artacağı üçün artıq yardım alan kateqoriyaya daxil edilməyəcək.

Sarjveladze əlavə edib ki, nazirliyin məqsədi vəsaitə qənaət etmək deyil.

“Bizim məqsədimiz hansısa məbləği azaltmaq və ya artırmaq deyil. Məqsədimiz maksimal effektivliyə nail olmaqdır ki, hər bir qəpik qanunvericiliklə nəzərdə tutulmuş real ehtiyaca yönəldilsin”, – deyə nazir bildirib.

Xatırladaq ki, Gürcüstan Səhiyyə Nazirliyi sosial müdafiə alan ailələrin vahid bazasının yenidən yoxlanılmasına başladığını açıqlayıb.