Kobaxidze: Sosial yardım alan 300 nəfərdən 49-nun 3000 laridən çox gəliri aşkarlanıb

Qurumlardan biri sosial yardım alan şəxslər arasında təsadüfi seçim prinsipi ilə 300 nəfəri yoxlayıb və onlardan 49-nun 3000 laridən artıq gəlirə malik olduğu müəyyən edilib.

InterPress.ge xəbər verir ki, bu barədə baş nazir İrakli Kobaxidze bildirib. 

Baş nazir bu açıqlamanı sosial cəhətdən həssas ailələrin vahid bazasının yenidən nəzərdən keçirilməsi ilə bağlı qərara münasibət bildirərkən səsləndirib.

Onun sözlərinə görə, 2020-ci ildən sonra sosial bazaların yoxlanılması faktiki olaraq dayanmışdı. 2020-ci ildə pandemiya səbəbindən sosial yardım alanların sayı artmış, lakin sonrakı illərdə bazanın sistemli şəkildə yenidən yoxlanılması həyata keçirilməmişdi.

“Yaranmış vəziyyətə görə biz müvafiq prosesi başlayırıq. Sosial cəhətdən həssas ailələrin bazası tam şəkildə yoxlanılacaq və yekunda bu bazada yalnız real olaraq dövlət yardımına ehtiyacı olan vətəndaşlar qalacaqlar”, – deyə Kobaxidze bildirib.

Baş nazir qeyd edib ki, 2014-2015-ci illərdə bazaların keyfiyyətli şəkildə yoxlanılması zamanı da siyasi spekulyasiyalar olmuşdu və oxşar hallar indi də mümkündür. Buna baxmayaraq, onun sözlərinə görə, proses qaçılmazdır.

Kobaxidze əlavə edib ki, iqtisadi artım vətəndaşların gəlirlərində əks olunur. Onun sözlərinə görə, 2020-ci ildən sonra ölkə iqtisadiyyatı 50 milyard laridən 104 milyard lariyə yüksəlib. Eyni zamanda, vətəndaşların ödədiyi gəlir vergisinin həcmi iki dəfə artıb ki, bu da gəlirlərin artdığını göstərir.

Baş nazir bildirib ki, Dünya Bankı ilə razılaşdırılmış metodologiyaya əsasən, yoxsulluq səviyyəsi 2020-ci ildəki 21,3 faizdən 9,4 faizə enib. Bununla belə, hazırda Gürcüstanda təxminən 350 min nəfər yoxsulluq həddindən aşağı yaşayır və hökumətin əsas məqsədi bu göstəricini sıfıra endirməkdir.

Xatırladaq ki, Səhiyyə Nazirliyi sosial cəhətdən həssas ailələrin bazasının aktiv şəkildə yenidən yoxlanılmasına başlayır. Nazir Mixeil Sarjveladze bildirib ki, məqsəd bazada yalnız real olaraq dövlət maliyyə yardımına ehtiyacı olan şəxslərin qalmasıdır. Onun sözlərinə görə, yoxlama zamanı hüquq pozuntusu aşkarlanarsa, müvafiq hüquqi məsuliyyət tədbirləri görüləcək. Bununla yanaşı, bazadan çıxarılma avtomatik olaraq məsuliyyətə cəlb olunma demək deyil.