Tbilisinin Didi Diğomi ərazisində yanğın olub

Gecə saatlarında Tbilisinin Didi Diğomi qəsəbəsində yerləşən anbar tipli binalardan birində yanğın baş verib. 

InterPress.ge xəbər verir ki, bu barədə Gürcüstan Fövqəladə Halların İdarə Olunması Xidməti məlumat yayıb.

Məlumata görə, yanğın barədə daxil olan məlumatdan qısa müddət sonra hadisə yerinə yanğınsöndürən-xilasedicilər cəlb olunub və alovun söndürülməsi istiqamətində aktiv işlərə başlanılıb.

İlkin məlumatlara əsasən, yanğın anbar ərazisində yayılıb. Yanğınsöndürənlər alovun daha geniş əraziyə yayılmasının qarşısını vaxtında alıblar.

Hazırda yanğın tamamilə söndürülüb və tüstülənən ayrı-ayrı ocaqların ləğvi üzrə işlər davam etdirilir.

Qurumun məlumatına görə, hadisə nəticəsində xəsarət alan olmayıb. Hadisə yerində Fövqəladə Halların İdarə Olunması Xidmətinin 21 ədəd yanğın-xilasetmə texnikası çalışıb.

Yanğının baş vermə səbəbi araşdırılır.