Elektronika mağazasından 10 noutbuk oğurlayan iki nəfər saxlanılıb
Gürcüstan Daxili İşlər Nazirliyinin Şida Kartli Polis Departamentinin Xaşuri rayon idarəsinin əməkdaşları 2002-ci il təvəllüdlü M.P. və əvvəllər məhkum olunmuş, həmçinin 2002-ci il təvəllüdlü M.A.-nı qabaqcadan əlbir olan qrup tərəfindən törədilmiş oğurluq ittihamı ilə saxlayıblar.
InterPress.ge xəbər verir ki, bu barədə məlumatı Gürcüstan Daxili İşlər Nazirliyi yayıb.
Məlumata görə, aparılan istintaq nəticəsində müəyyən edilib ki, təqsirləndirilən şəxslər gecə saatlarında Xaşuri şəhərində yerləşən “Elite Electronics” mağazasına qanunsuz daxil olaraq 10 ədəd noutbuku ələ keçirib və hadisə yerindən qaçıblar.
Kompleks operativ tədbirlər və istintaq hərəkətləri nəticəsində hüquq-mühafizə orqanları qısa müddətdə cinayəti törədən şəxslərin kimliyini müəyyən edərək onları təqsirləndirilən şəxs qismində saxlayıblar.
Polis məhkəmə qərarı əsasında onların yaşayış evlərində və yardımçı otaqlarda aparılan axtarış zamanı oğurlanmış noutbukları maddi sübut kimi tam şəkildə müsadirə edib.
Faktla bağlı istintaq Gürcüstan Cinayət Məcəlləsinin 177-ci maddəsinin 2-ci, 3-cü və 4-cü hissələri ilə aparılır. Bu maddə 10 ilədək azadlıqdan məhrumetmə cəzasını nəzərdə tutur.
