“Urologiya Mərkəzi”ndə insident – 23 yaşlı qızın ölümündən sonra ailəsi klinikada şüşələri sındırıb

Tbilisidə yerləşən “Urologiya Mərkəzi”ndə 23 yaşlı qızın ölümündən sonra qalmaqal baş verib.

InterPress.ge xəbər verir ki, mərhumun ailə üzvləri klinikada şüşələri sındıraraq etiraz ediblər.

Ailə üzvləri gənc qadının ölümündə klinikanın həkimini günahlandırırlar. Onların sözlərinə görə, qıza sidik daşı xəstəliyi ilə bağlı lazerlə daşın parçalanması əməliyyatı aparılıb.

Alazovlar ailəsi bildirir ki, qız planlı əməliyyat üçün xəstəxanaya müraciət edib. Əməliyyatdan bir gün sonra onun vəziyyəti pisləşib və bir neçə gün sonra həyatını itirib.

Ailə hadisənin necə baş verdiyini və əməliyyat zamanı nə baş verdiyini öyrənmək üçün cavab tələb edir. Səhər saatlarından etibarən klinika ərazisinə polis cəlb olunub.

Mərhumun yaxınları bildiriblər ki, əvvəlcə onlara əməliyyatın təhlükəli olmadığı və hər şeyin normal keçəcəyi deyilib. Onların sözlərinə görə, əməliyyatdan sonra klinika ilkin olaraq vəziyyətin yaxşı olduğunu bildirib, lakin daha sonra xəstənin vəziyyəti qəfil ağırlaşıb və başqa xəstəxanaya köçürülüb.

Ailə üzvü bildirib ki, məsələ araşdırılmasa, işi başqa ölkələrin mütəxəssislərinin də iştirakı ilə araşdırmaq niyyətindədir və məsul şəxsin cəzalandırılmasını tələb edir.

Klinika isə baş verən hadisəyə görə məsuliyyəti üzərindən götürmədiyini bildirir. Klinika rəhbərinin sözlərinə görə, 23 yaşlı qadına sidik daşı xəstəliyi ilə bağlı endoskopik əməliyyat aparılıb və əməliyyat mərkəzin aparıcı mütəxəssisi Aleksandre Ucmajuri dze tərəfindən həyata keçirilib.

Onun sözlərinə görə, bu tip əməliyyatlar ildə ən azı 400 dəfə aparılır və həmin gün də bir neçə belə əməliyyat həyata keçirilib. Əməliyyat günü qanaxma qeydə alınmayıb, lakin növbəti gün xəstədə hemolitik sindrom inkişaf edib, bu isə böyrək və qaraciyərin kəskin çatışmazlığı ilə müşayiət olunub. Bu səbəbdən xəstə İnqoroqva klinikasına köçürülüb.

Klinika rəhbəri bildirib ki, nadir rast gəlinən bu ağırlaşmanın dəqiq səbəbi hələ müəyyən edilməyib və hazırda ekspertiza rəyinin nəticələri gözlənilir.