Prezident Mixeil Kavelaşvili müsəlman icmasını Ramazan və Novruz bayramı münasibətilə təbrik edib

Gürcüstan Prezidenti Mixeil Kavelaşvili ölkədə yaşayan müsəlman vətəndaşları Ramazan və Novruz bayramları münasibətilə təbrik edib.

InterPress.ge xəbər verir ki, prezident paylaşımında müsəlman icmasına göstərdikləri həmrəylik və dəstəyə görə təşəkkürünü bildirib.

Kavelaşvili qeyd edib ki, II İliyanın vəfatı ilə bağlı matəm günlərində müsəlman icmasının həmrəylik nümayiş etdirməsi xüsusi əhəmiyyət daşıyır.

“Katolikos-Patriarx, Həzrətləri və Müqəddəsliyi II İliyanın vəfatı ilə əlaqədar matəm içində olan pravoslav xristianlara göstərdiyiniz böyük dəstəyə görə sizə səmimi təşəkkürümü bildirirəm”, – deyə o qeyd edib.

Prezident vurğulayıb ki, müsəlman icmasının bayram tədbirlərindən imtina edərək ümumi kədəri bölüşməsi ölkədəki qardaşlıq, dostluq və qarşılıqlı hörmətin bariz nümunəsidir.

Onun sözlərinə görə, bu münasibətlər Gürcüstanda müxtəlif dini icmalar arasında mövcud olan birgəyaşayışın əsasını təşkil edir.

Sonda prezident bir daha müsəlman vətəndaşları təbrik edərək onlara sülh, xoşbəxtlik və rifah arzulayıb, həmçinin son günlərdə nümayiş etdirdikləri həmrəyliyə görə təşəkkür edib.