30 nəfər məsuliyyətə cəlb edildi – qanunsuz hasilat və torpaq fırıldaqları ifşa olundu - SƏS

Gürcüstan Maliyyə Nazirliyinin İstintaq Xidməti tərəfindən genişmiqyaslı əməliyyatlar nəticəsində müxtəlif cinayət işləri üzrə 30 nəfər saxlanılıb və məsuliyyətə cəlb olunub.

InterPress.ge xəbər verir ki, Gürcüstan Maliyyə Nazirliyinin İstintaq Xidməti və Gürcüstan Prokurorluğu ilə koordinasiya şəraitində aparılan istintaq zamanı qanunsuz sahibkarlıq və dövlət əmlakının mənimsənilməsi faktları aşkarlanıb.

İstintaq çərçivəsində 3 qanunsuz sahibkarlıq faktı müəyyən edilib. Təqsirləndirilən şəxslər Şida Kartli, İmereti, Mtsxeta-Mtianeti və Kaxeti regionlarında lisenziyasız və ya lisenziya şərtlərini pozaraq faydalı qazıntıların çıxarılması və satışını həyata keçiriblər. Bu faktlar üzrə 6 nəfər ifşa olunub, onlardan 4-ü saxlanılıb.

Araşdırmalar nəticəsində:

Qori bələdiyyəsində Böyük Liaxvi çayının məcrasından 9 163.35 kubmetr qum-çınqıl qanunsuz çıxarılıb və ətraf mühitə 138 050 lari ziyan vurulub;

İmeretidə saxta sənədlərlə 3 443 000 lari dəyərində məhsul rəsmiləşdirilib, həmçinin Rioni çayından 1 346 371 kubmetr qazıntı çıxarılaraq 19 561 423 lari ziyan vurulub;

Qurcaani və Mtsxeta rayonlarında 144 793 kubmetr qum-çınqıl qanunsuz çıxarılıb, ziyan 2 172 502 lari təşkil edib.

Ümumilikdə 1 500 327 kubmetr faydalı qazıntı qanunsuz hasil edilib, ətraf mühitə dəyən ziyan isə 21 871 975 lariyə çatıb.

Bundan əlavə, dövlət torpaqlarının fırıldaq yolu ilə ələ keçirilməsi ilə bağlı bir neçə fakt da üzə çıxarılıb. Müxtəlif işlər üzrə ümumilikdə 20 194 kvadratmetr dövlət torpağı qanunsuz mənimsənilib və bunun ümumi dəyəri 2 141 042 lari təşkil edir. Bu işlər üzrə 18 nəfər məsuliyyətə cəlb olunub.

İstintaq davam edir və qanunvericiliyə əsasən təqsirləndirilən şəxsləri 5 ildən 12 ilədək, bəzi hallarda isə 6 ildən 9 ilədək azadlıqdan məhrumetmə cəzası gözləyir.

Qurum bildirir ki, cinayət sxemlərində iştirak edən digər şəxslərin müəyyən olunması istiqamətində əməliyyatlar davam etdirilir və dövlət büdcəsinə və ətraf mühitə zərər vuran hallara qarşı sərt tədbirlər görüləcək.