Hərbi hospitalın şöbə müdiri rüşvət almaqda ittiham edilərək saxlanılıb
Kutaisidə rüşvət tələb etmə və alma faktı üzrə bir nəfər saxlanılıb.
InterPress.ge xəbər verir ki, bu barədə Gürcüstan Maliyyə Nazirliyinin İstintaq Xidməti məlumat yayıb.
Məlumata görə, saxlanılan şəxs Giorgi Abramishvili adına Gürcüstan Müdafiə Nazirliyinin Hərbi Hospitalının Kutaisi Tibb Mərkəzinin şöbə müdiridir.
İstintaqla müəyyən edilib ki, təqsirləndirilən şəxs çağırışçının hərbi xidmətdən yayınması məqsədilə 3 000 lari müqabilində saxta məlumatlar əks etdirən tibbi arayışın verilməsini təmin edib. Həmin arayış əsasında vətəndaşın hərbi öhdəlikdən azad olunması mümkün olub.
Əməliyyat-axtarış və gizli istintaq tədbirləri nəticəsində cinayət əməlini təsdiqləyən audio və video sübutlar əldə edilib. Əməliyyat Qərbi Gürcüstan Dairəvi Prokurorluğu, Gürcüstan Dövlət Təhlükəsizliyi Xidməti və Müdafiə Nazirliyinin Baş Müfəttişliyi ilə koordinasiyalı şəkildə həyata keçirilib.
Faktla bağlı Gürcüstan Cinayət Məcəlləsinin 338-ci maddəsinin birinci hissəsi ilə istintaq aparılır. Həmin maddə 6 ildən 9 ilədək azadlıqdan məhrumetmə cəzasını nəzərdə tutur.
Qurum bəyan edib ki, dövlət qulluqçuları və onlarla qanunsuz sövdələşməyə girməyə cəhd edən şəxslər bu kimi əməllərdən çəkinməlidir və belə hallara qarşı reaksiya hər zaman sərt olacaq.
