2026-cı il imtahanları üçün qeydiyyat başladı
2026-cı il üçün vahid milli və ümumi magistratura imtahanlarına qeydiyyat başlayıb və 11 may saat 18:00-dək davam edəcək.
InterPress.ge xəbər verir ki, bu barədə Gürcüstan Təhsil, Elm və Gənclər Nazirliyi məlumat yayıb.
Məlumata görə, abituriyentlər və magistraturaya namizədlər qeydiyyatdan elektron şəkildə Milli Qiymətləndirmə və İmtahanlar Mərkəzinin rəsmi saytı – online.naec.ge vasitəsilə keçə bilərlər.
Bildirilib ki, namizədlər 6 aprel saat 10:00-dan 6 may saat 18:00-dək ən azı bir imtahan fənninin ödənişini etməlidirlər ki, qeydiyyatı 11 may saat 18:00-dək tamamlaya bilsinlər. Bu müddət ərzində digər fənlərin seçilməsi, ödənişi, imtahan şəhərinin və təhsil proqramlarının seçilməsi və ya dəyişdirilməsi də mümkündür.
Qeyd olunub ki, bu il abituriyentlər istədikləri sayda ali təhsil proqramları ilə yanaşı, peşə təhsili proqramlarını da seçə biləcəklər.
Həmçinin bildirilib ki, dövlət universitetlərində bakalavr və magistratura pillələri üzrə, eləcə də dövlət peşə təhsili müəssisələrində təhsil alan tələbələr üçün təhsil tam dövlət tərəfindən maliyyələşdiriləcək.
Ətraflı məlumat üçün namizədlərə Milli Qiymətləndirmə və İmtahanlar Mərkəzinin rəsmi saytına daxil olmaq tövsiyə olunur.
