Gürcüstanda viza müraciətinə baxılma haqqı 20–500 dollar arası müəyyən ediləcək

Gürcüstanda vizanın verilməsi ilə bağlı müraciətlərə baxılma haqqı minimum 20 ABŞ dolları, maksimum isə 500 ABŞ dolları məbləğində müəyyən ediləcək.

InterPress.ge xəbər verir ki, bununla bağlı dəyişikliklər “Konsulluq xidmətləri haqqında” qanuna edilir. Qanun layihəsi “Gürcü Arzusu” tərəfindən hazırlanaraq parlamentə sürətləndirilmiş qaydada təqdim olunub.

Layihəyə əsasən, konkret məbləğlər Gürcüstan hökumətinin normativ aktı ilə müəyyən ediləcək.

Eyni zamanda, sənəddə qeyd olunur ki, sürətləndirilmiş viza xidmətləri üçün tətbiq olunacaq əlavə rüsumların məbləği də hökumət tərəfindən ayrıca tənzimlənəcək.