SEMEK: "Mamedi" şirkətinin Qızılhacılı sakinlərinə göndərdiyi SMS yalandır – Qaz tarifi 1,29 lari olmayacaq
Gürcüstanın Energetika və Su Təchizatı üzrə Milli Tənzimləmə Komissiyası (SEMEK) "Mamedi" MMC tərəfindən Marneuli bələdiyyəsinin Qızılhacılı kəndi sakinlərinə təbii qaz tarifi ilə bağlı göndərilən SMS məlumatına münasibət bildirib.
InterPress.ge xəbər verir ki, SEMEK-in açıqlamasına görə, şirkətin 2026-cı il 6 iyul tarixindən etibarən əhalinin təbii qaza görə ödənişi 1,29 lari/kubmetr kommersiya tarifi ilə edəcəyi barədə yaydığı məlumat tamamilə yalandır və əhalini qəsdən çaşdırmağa yönəlmiş cəhddir.
Komissiya bildirib ki, Qızılhacılı kəndinin sakinləri təbii qaza görə ödənişi SEMEK tərəfindən müəyyən edilmiş tarif – ƏDV daxil olmaqla 47 tetri/kubmetr əsasında ödəyəcəklər.
SEMEK həmçinin xatırladıb ki, "Mamedi" MMC-nin lisenziya şərtlərini pozması səbəbindən şirkətin təbii qazın paylanması lisenziyasının ləğvi ilə bağlı Komissiyada açıq inzibati icraat aparılır.
Komissiya vurğulayıb ki, şirkətin lisenziyasının ləğv edilməsi əhalinin təbii qazla təminatında heç bir fasiləyə səbəb olmayacaq.
Açıqlamada qeyd olunur ki, istehlakçılar təbii qazı fasiləsiz almağa davam edəcək və 47 tetri/kubmetr tarifi qüvvədə qalacaq.
SEMEK-in məlumatına əsasən, "Mamedi" MMC-nin lisenziyasının ləğv edilməsinin əsas səbəbi şirkətin lisenziya öhdəliklərini yerinə yetirməməsidir. Belə ki, şirkət aldığı təbii qaza görə yığılmış borclarını ödəməyib.
Bundan əlavə, SEMEK bildirib ki, şirkət Komissiyanın təsdiq etdiyi tarifə baxmayaraq, istehlakçılardan özbaşına şəkildə daha yüksək – ƏDV daxil olmaqla 57 tetri/kubmetr tarif tətbiq edib. Bu faktla bağlı hazırda müvafiq istintaq orqanları tərəfindən araşdırma aparılır.
