Tbilisidə soyğunçuluğa cəhddə təqsirləndirilən iki əcnəbi saxlanılıb

Gürcüstan Daxili İşlər Nazirliyinin Tbilisi Polis Departamentinin Köhnə Tbilisi Baş İdarəsinin əməkdaşları əvvəlcədən əlbir olan qrup tərəfindən soyğunçuluğa cəhddə ittiham olunan iki xarici ölkə vətəndaşını saxlayıblar.

InterPress.ge xəbər verir ki, bu barədə Gürcüstan Daxili İşlər Nazirliyi məlumat yayıb.

Nazirliyin məlumatına görə, təqsirləndirilən şəxslər Tbilisinin Giorgi Leonidze küçəsi yaxınlığında xarici ölkə vətəndaşına məxsus şəxsi əşyaları və pul vəsaitini qanunsuz yolla ələ keçirməyə cəhd ediblər.

Hüquq-mühafizə orqanlarının əməkdaşları şübhəliləri hadisə yerində saxlayıb, qanunsuz yolla ələ keçirilmiş pul vəsaitini isə maddi sübut kimi götürüblər.

Faktla bağlı Gürcüstan Cinayət Məcəlləsinin 19-178-ci maddəsi (soyğunçuluğa cəhd) ilə istintaq aparılır. Sözügedən maddə 11 ilədək azadlıqdan məhrumetmə cəzasını nəzərdə tutur.