Marketə basqın edən şəxs "isti izlərlə" saxlanıldı

Tbilisidə fəaliyyət göstərən şəbəkə marketlərindən birinə quldurluq məqsədilə daxil olaraq kassadakı pulu ələ keçirən, əvvəllər məhkum olunmuş və hazırda şərti cəza altında olan şəxs hüquq-mühafizə orqanları tərəfindən saxlanılıb.

InterPress.ge xəbər verir ki, bu barədə Gürcüstan Daxili İşlər Nazirliyi məlumat yayıb. Bildirilib ki, Tbilisi Polis Departamentinin İsani-Samqori Baş İdarəsinin və Acariya Polis Departamentinin əməkdaşları təqsirləndirilən şəxsi quldurluq ittihamı ilə "isti izlərlə" saxlayıblar.

İstintaqla müəyyən edilib ki, saxlanılan şəxs Tbilisidə yerləşən şəbəkə marketlərindən birinin filialına daxil olaraq küt alət nümayiş etdirib, kassir-operatoru ölümlə hədələyib və zor tətbiq etməklə kassadakı pul vəsaitini qanunsuz olaraq ələ keçirib.

Hüquq-mühafizə orqanlarının keçirdiyi operativ-axtarış və istintaq tədbirləri nəticəsində cinayəti törədən şəxs hadisədən qısa müddət sonra saxlanılıb.

Faktla bağlı istintaq Gürcüstan Cinayət Məcəlləsinin 179-cu maddəsi ilə aparılır. Həmin maddə quldurluq cinayətini nəzərdə tutur və 12 ilədək azadlıqdan məhrumetmə cəzası ilə nəticələnə bilər.