Tbilisi hava limanında FBI tərəfindən axtarışda olan şəxs saxlanılıb
Gürcüstan hüquq-mühafizə orqanları Tbilisi Beynəlxalq Hava Limanında terror təşkilatlarının fəaliyyətinə dəstək verməkdə ittiham olunan və ABŞ Federal Təhqiqatlar Bürosu (FBI) tərəfindən beynəlxalq axtarışda olan şəxsi saxlayıb.
InterPress.ge xəbər verir ki, bu barədə Gürcüstan Daxili İşlər Nazirliyi məlumat yayıb.
Nazirliyin məlumatına görə, saxlanılan şəxs xarici terror təşkilatına maddi dəstək göstərmək məqsədilə sui-qəsddə, maddi dəstək göstərməkdə və buna cəhd etməkdə ittiham olunaraq axtarışda olub.
Məlumata əsasən, Daxili İşlər Nazirliyinin Mərkəzi Cinayət Polisi Departamentinin və Gürcüstan Baş Prokurorluğunun əməkdaşları ABŞ Dövlət Departamentinin nümayəndələri ilə imzalanmış birgə deklarasiya çərçivəsində FBI ilə sıx ikitərəfli koordinasiya nəticəsində ABŞ və Özbəkistan vətəndaşı olan şəxsi saxlayıblar.
Şəxs Mərkəzi Cinayət Polisi Departamentinin Mütəşəkkil Cinayətkarlığa Qarşı Mübarizə Baş İdarəsinin Axtarış İdarəsinin əməkdaşları tərəfindən Tbilisi Beynəlxalq Hava Limanında, başqa ölkədən Gürcüstana gəldiyi zaman saxlanılıb.
ABŞ hüquq-mühafizə orqanlarının məlumatına görə, axtarışda olan şəxs ABŞ-da xarici terror təşkilatına dəstək göstərmək məqsədilə qrup yaradıb və eyni məqsədlə özünün rəhbərlik etdiyi maliyyə dəstəyi şəbəkəsi formalaşdırıb.
Məlumata görə, həmin qrupun rəhbəri və üzvləri Suriyada fəaliyyət göstərən terror təşkilatlarına, o cümlədən “İslam Dövləti”nə aktiv maddi-texniki və maliyyə dəstəyi göstəriblər.
Bundan əlavə, saxlanılan şəxsin müxtəlif şəxsləri Suriyaya döyüşmək üçün getməyə çağırdığı və onlara bu istiqamətdə yardım təklif etdiyi bildirilir.
Hazırda saxlanılan şəxslə bağlı qanunvericilikdə nəzərdə tutulan ekstradisiya prosedurları həyata keçirilir.
Gürcüstan Daxili İşlər Nazirliyi ABŞ hüquq-mühafizə orqanları ilə müxtəlif kateqoriyalı cinayətlərin qarşısının alınması və onlara qarşı mübarizə sahəsində uzun illərdir uğurla əməkdaşlıq etdiyini bildirib.
