Marta Kos: “Gürcüstanın namizəd statusu yalnız kağız üzərində mövcuddur”

“Gürcüstanın namizəd statusu yalnız kağız üzərində mövcuddur. Gürcüstan hakimiyyəti ilə yenidən fəal əməkdaşlıq etməyi çox istəyirik, lakin onlar addımlar atmalıdırlar”.

InterPress.ge xəbər verir ki, bu barədə Avropa Komissiyasının genişlənmə məsələləri üzrə komissarı Marta Kos Lüksemburqda Avropa İttifaqının xarici işlər nazirlərinin görüşündən əvvəl jurnalistlərə açıqlamasında bildirib. O, Avropa İttifaqının Gürcüstan hökuməti ilə əməkdaşlıq etməyi planlaşdırıb-planlaşdırmadığı barədə suala cavab verib.

“Onlar irəliləmədikcə və əksinə, qəbul etdikləri qanunlarla gerilədikcə, irəliləyiş olmadığı və Avropa dəyərlərinə doğru addımlar atılmadığı müddətdə onlarla əməkdaşlıq etməyəcəyik”, – deyə Marta Kos qeyd edib.

Bununla yanaşı, onun sözlərinə görə, Avropa İttifaqı vətəndaş cəmiyyəti ilə əməkdaşlığı davam etdirir və Gürcüstan xalqına dəstək verir.

“Lakin Gürcüstan əhalisi üçün çox mühüm mesajımız var: hakimiyyətlə əməkdaşlıq etməsək də, vətəndaş cəmiyyəti ilə əməkdaşlıq edir və xalqa dəstək veririk. Yardım göstərdiyimiz bir çox sahə var və bunu gələcəkdə də davam etdirəcəyik. Gürcüstanın yalnız kağız üzərində namizəd ölkə olmaması yaxşı olardı, lakin irəliləyiş üçün hər iki tərəfin iştirakı lazımdır”, – deyə Marta Kos bildirib.