Azərbaycanın Gürcüstandakı Səfirliyində iftar süfrəsi təşkil edilib - FOTO
11 may 2021-ci il tarixində Azərbaycan Respublikasının Gürcüstandakı Səfirliyində iftar təşkil edilib.
InterPress.ge xəbər verir ki, tədbir müqəddəs Qurani-Kərim ayələrinin və iftar duasının oxunması ilə açılıb.
Səfirliyə təşrif buyurmuş dəyərli qonaqları, Gürcüstanın rəsmi dövlət qurumları rəhbərliyinin nümayəndələrini və din xadimlərini səmimi qəlbdən salamlayan Azərbaycan Respublikasının Gürcüstandakı Səfiri Faiq Quliyev 11 ayın sultanı olan Ramazanın ehtiva etdiyi nəcib mənalarını qeyd edərək, bu ay ərzində ədalət, saf niyyətlər və nəfsin paklaşdırılması ətrafında insanların birləşməli olduğunu vurğulayıb.
Səfirlikdə təşkil edilən iftar məclisində də Azərbaycan, Gürcüstan və Türkiyəni, həm müsəlman, həm də xristian dinini təmsil edən simaların dostcasına, qarşılıqlı hörmət və rəğbət əsasında toplaşması ölkələrimiz və xalqlarımız arasında tarixən formalaşmış sarsılmaz dostluq və qardaşlıq tellərinin bariz nümunəsi kimi diqqətə çatdırılıb.
Azərbaycan Respublikasının ölkəmizlə münasibətlərin inkişafına həmişə prioritet önəm verdiyinə nəzər salan Azərbaycanın Gürcüstandakı səfiri F.Quliyev ötən günlərdə Gürcüstanın Baş naziri İrakli Ğaribaşvilinin Azərbaycana etdiyi rəsmi səfər çərçivəsində Azərbaycan Respublikasının Prezidenti İlham Əliyev tərəfindən qəbul olunması və ətraflı danışıqların keçirilməsi, eləcə də səfər çərçivəsində digər görüşlərin baş tutması ənənəvi ikitərəfli strateji tərəfdaşlığın daha da irəli aparılmasına yeni təkan verəcəyinə dair əminlik ifadə edilib.
Azərbaycan Respublikasının beynəlxalq müstəvidə hər zaman dost Gürcüstanla həmrəylik göstərməsi, ərazi bütövlüyü prinsipinə sadiq qalması da ölkələrimizi birləşdirən vacib amil kimi səciyyələndirilib. Bu xüsusda, ötən ildə 44 günlük Qarabağ müharibəsi sayəsində Azərbaycan Respublikasının beynəlxalq səviyyədə tanınmış sərhədlərinin bərpa olunması nəinki Azərbaycan, bütün bölgə, o cümlədən Gürcüstan üçün də yeni əlverişli şəraitin yaratması ilə yanaşı, sözün əsl mənasında Ədalət Zəfəri kimi vurğulanıb.
İki ölkə arasında möhkəm əlaqələrin təmin və inkişaf etdirilməsində Gürcüstanda tarixən yaşayan azərbaycanlıların müstəsna rolu, onların həmişə bu ölkənin sədaqətli vətəndaşları olmaqla, Azərbaycanla mənəvi əlaqələrin inkişaf etdirməsində göstərdiyi əzm və qətiyyət məmnuniyyətlə qeyd edilib.
Səfir F.Quliyev bütün məclis iştirakçılarına qarşıdan gələn Ramazan Bayramı münasibəti ilə bir daha ən xoş və səmimi təbrikləri çatdıraraq, gələcəkdə Azərbaycan, Gürcüstan və Türkiyə strateji tərəfdaşlığının bütün bölgəmiz və xalqlarımız üçün həm maddi, həm də mənəvi cəhətdən daha parlaq nailiyyətlərə gətirəcəyinə dair əminlik ifadə edib.
Tədbirdə öz sözünü söyləyən Gürcüstan Xarici İşlər nazirinin müavini Laşa Darsalia iki ölkə arasında uğurla inkişaf edən strateji tərəfdaşlığın əhəmiyyətini vurğulayaraq, Hökumət başçısı İrakli Ğaribaşvilinin Azərbaycana son səfərinin olduqca önəmli olduğunu qeyd edib. O, Gürcüstanda tarixən yaşayan azərbaycanlıların öz adət-ənənələrini qoruyub saxladığını, ölkənin mədəni rəngarəngliyinə mühüm töhfə verdiyini qeyd edərək, Gürcüstan Hökumətinin də hər zaman bunun üçün şərait yaratdığını söyləyib. Hər iki ölkənin ali siyasi rəhbərliyi səviyyəsində müəyyən edilən vəzifələrin bundan sonra da yerinə yetirilməsi sahəsində uğurların əldə ediləcəyinə dair əminliyi bildirən Gürcüstan XİN-i başçısının müavini Azərbaycan tərəfinə, o cümlədən Səfirliyə Gürcüstanla münasibətlərin inkişaf etdirilməsi istiqamətində göstərdiyi xoş məram və fəallıq üçün təşəkkür edib.
Gürcüstanın Dini Məsələlər üzrə Dövlət Agentliyinin sədri Zaza Vaşağmadze də çıxışında təmsil etdiyi qurum və şəxsən öz adından ölkənin müsəlman icmasının təmsilçilərinə Ramazan Bayramı münasibətilə təbrik edib. O, rəhbəri olduğu Agentliyin həm ölkə daxilində, həm də qonşu ölkələrlə münasibətlərdə həmişə dinlərarası harmoniyanın təşviq edilməsinə çalışdığını söyləyib. Bu baxımdan Azərbaycan və Türkiyə kimi ən yaxın və dost ölkələrdə dini məsələlər sahəsində dövlət siyasətini həyata keçirən qurumlarla müqayisədə Gürcüstanda bu cür Agentliyin nisbətən yeni olduğunu qeyd edən Z.Vaşağmadze Azərbaycan tərəfi ilə qarşılıqlı təmasların və faydalı əməkdaşlığın etməsi üçün çalışmaq niyyətində olduğunu söyləyib.
Türkiyə Cümhuriyyətinin Gürcüstandakı Fövqəladə və Səlahiyyətli Səfiri Fatma Ceren Yazqan də öz çıxışında Azərbaycan Səfirliyin də açılan iftar süfrəsinə qatılmaqdan məmnun olduğunu bildirərək, bunun dünya miqyasında misli görünməmiş Türkiyə - Azərbaycan münasibətlərinin Gürcüstan torpağında nümayiş etdirilən bariz nümunəsi kimi səciyyələndirib. O, Ramazan dəyərlərinin müasir dünyanın şəraitinə uyğun olaraq birgə təbliğ edilməsinin və bu sahədə bölgəmizdə olan təcrübənin dünya miqyasında örnək ola biləcəyini qeyd edib.
Tbilisi Ruhani Akademiyası və Seminariyasının rektoru protopresviter Qiorqi Zviadadze təmsil etdiyi Gürcüstan Patriarxlığı adından Ramazan Bayramı münasibətilə səmimi salamları və ən xoş təbrikləri yetirərək, gürcü xalqı və Gürcüstan Pravoslav Kilsəsinin də həmişə səmavi dinlərin təbliğ etdiyi dəyərlərin keşiyində durduğunu söyləyib və bu sahədə qonşu Azərbaycanın dini rəhbərliyi ilə nümunəvi əməkdaşlığın qurduğunu qeyd edib. O, Katolikos-Patriarx II İlia ilə Qafqaz Müsəlmanları İdarəsinin sədri Şeyxülislam Hacı Allahşükür Paşazadə arasında bərqərar olunmuş möhkəm dostluq və qarşılıqlı hörmət münasibətlərinin dəyərli örnəyi kimi təqdim edib. İki dost xalq və dini qurumlar arasında təşəkkül tapmış bütün münasibətlərin gələcəkdə də yüksək səviyyədə davam etdiriləcəyi barədə söz açan kilsə xadimi bunun əhəmiyyətini vurğulayıb.
Qafqaz Müsəlmanları İdarəsinin Gürcüstan nümayəndəliyinin rəhbəri Hacı Əli Əliyev öz tərəfindən Qafqazın Şeyxülislamı Hacı Allahşükür Paşazadənin, eləcə də Gürcüstanda yaşayan bütün müsəlmanlar və soydaşlarımızın da Gürcü Pravoslav Kilsəsinin başçısı Katolikos-Patriarx II İliaya bəslədiyi dərin ehtiramını önə çəkərək, Azərbaycan və Gürcüstanın dini qurumları arasındakı sıx əlaqələri təqdirəlayiq dinlərarası əməkdaşlığın bariz misalı kimi qeyd edib və bu əlaqələrin gələcəkdə də hər iki xalqın, bütün dindarların xeyrinə mühüm töhfə verəcəyinə dair əminlik ifadə edib.
Bütün Gürcüstan Müsəlmanları İdarəsinin Qərbi Gürcüstan müftisi Adəm Şantadze də öz sözündə Ramazan Bayramının xeyirxah mənaları üzərində dayanaraq, Gürcüstanda əhalinin əzəli parçası olan müsəlman icmasının öz fəaliyyətində həm dini, həm də vətəndaşlıq dəyərlərinin rəhbər tutduğunu söyləyib. O, Azərbaycan Səfirliyinə iftar məclisinin təşkil edilməsinə görə təşəkkür bildirərək, bu tədbirə qatılmağından qürur hissi keçirdiyini qeyd edib, bu cür rəmzi xarakter daşıyan iftar süfrəsi arxasında üç ölkənin dövlət və din xadimlərinin əyləşməsini olduqca yüksək qiymətləndirib.
Azərbaycan, Gürcüstan və Türkiyənin həm dövlət və hökumətlər, həm də xalq, ictimaiyyət səviyyəsində sarsılmaz dostluğunun təcəssümü olmuş iftar məclisində bütün iştirak edənlər, o cümlədən Gürcüstanın Dini Məsələlər üzrə Dövlət Agentliyinin sədr müavini Qiorqi Ukleba, Gürcü Pravoslav Kilsəsinin protoiereyi Vissarion Çinçadze, Türkiyənin Gürcüstandakı Səfirliyinin dini məsələlər üzrə müşaviri Ahmet Erdem, Qafqaz Müsəlmanları İdarəsinin Gürcüstan nümayəndəliyinin rəhbəri Hacı Əli Əliyev, Bütün Gürcüstan Müsəlmanları İdarəsinin şeyxi Hacı Ramin İgidov, bu qurumun Şərqi Gürcüstan üzrə müftisi Hacı Etibar Eminov və digər əməkdaşları, Ümumi Gürcüstan Müsəlmanları Ali Dini İdarəsinin sədri Mirtağı Əsədov, Gürcüstanın “Əhli-Beyt” Cəmiyyətinin sədri Hacı Rasim Məmmədov, “Alul-Beyt” Mərkəzinin sədri Hacı Faiq Nəbiyev, Marneulinin baş axundu Hacı Əziz Nəbiyev, Marneulidəki “İmam Əli” məscidinin axundu Hacı Hacıyev, habelə Azərbaycan Səfirliyinin əməkdaşları mübarək Ramazan ayının sona yetməsi ərəfəsində oxunan dualara qoşulmuş və bütün Gürcüstan, Azərbaycan, Türkiyə, eləcə də dünya müsəlmanlarına ürək təbriklərini çatdırıblar.
