Avropa İttifaqı Rusiyaya qarşı ən geniş sanksiya paketini təsdiqləyib

“Avropa İttifaqı Rusiyanın hərbi və sənaye kompleksinə aid 1 569 şəxs və şirkətə qarşı əlavə məhdudlaşdırıcı tədbirləri təsdiqləyib. Sanksiya siyahısına 826 Rusiya şirkəti və həmin şirkətlərin 743 baş direktoru daxildir”.

InterPress.ge xəbər verir ki, bu barədə Avropa İttifaqı Şurasının mətbuat xidməti məlumat yayıb.

Qurumun açıqlamasında bildirilib ki, bu, Avropa İttifaqı tərəfindən təsdiqlənmiş ən böyük sanksiya siyahısıdır. Ukraynanın ərazi bütövlüyünün dəstəklənməsi ilə bağlı sanksiya rejimi çərçivəsində sanksiyalara məruz qalanların ümumi sayı 4 600-ə yaxınlaşır.

Məlumata görə, yeni sanksiyalar Rusiya hərbi sənayesinin əsasını təşkil edən orta səviyyəli təchizatçılara yönəlib. Bu şirkətlərin illik dövriyyəsi ən azı 20 milyard avro təşkil edir və onlar 250 mindən çox insanı işlə təmin edirlər.

Avropa İttifaqı Şurasının açıqlamasında qeyd olunub ki, sanksiyaya məruz qalan şirkətlər Rusiyanın raketlər, pilotsuz uçuş aparatları və təyyarələr də daxil olmaqla, qabaqcıl silah sistemləri üçün əsas komponentlər təchiz edirlər.

Bu komponentlərə yarımkeçiricilər, mikrosxemlər və kompüterlər daxil olmaqla elektron avadanlıqlar, radarlar, antenalar və ötürücülər daxil olmaqla rabitə avadanlıqları, aviasiya, peyk və raket sistemləri, partlayıcı maddələr və döyüş sursatları, optik və naviqasiya sistemləri daxildir.