Büdcəyə külli miqdarda pul ödəməkdən yayınan şirkət direktoru məsuliyyətə cəlb edildi

Acarıstan bölgəsində qəsdən vergidən yayınma faktı ilə bağlı şirkət direktoru məsuliyyətə cəlb edilib.

InterPress.ge xəbər verir ki, bu barədə İstintaq Xidməti məlumat verib.

“İstintaqla müəyyən edilib ki, təqsirləndirilən şəxs faktiki idarə etdiyi şirkət vasitəsilə qanunsuz maddi səmərə əldə etmək məqsədi ilə vergi qanunvericiliyini pozaraq 2016-2019-cu illərdə sistematik olaraq gəlirləri haqqında düzgün olmayan bəyannamələr verib və bu yolla dövlət büdcəsinə 1 199 261 lari ödəməkdən yayınıb", - məlumatda qeyd olunub.

İstintaq Gürcüstan Cinayət Məcəlləsinin 5 ildən 8 ilədək müddətə azadlıqdan məhrumetməni nəzərdə tutan 218-ci maddəsinin 2-ci hissəsinə əsasən aparılır.