Gürcüstanda birinci sinif şagirdləri üçün yeni dövlət proqramı — hər şagird öz fidanını əkəcək

“Gürcüstan hökuməti birinci sinif şagirdləri üçün yeni dövlət proqramı — «Mənim ilk fidanım» proqramını təsdiqləyib”.

InterPress.ge xəbər verir ki, Baş nazir İrakli Kobaxidzenin imzaladığı sərəncama əsasən, ölkə üzrə bütün birinci sinif şagirdlərinə öz fidanlarını əkmək və onun böyüməsi və inkişafını müşahidə etmək imkanı yaradılacaq.

Hökumətin sərəncamına əsasən, layihənin əsas məqsədi meşələrin və yaşıl sahələrin bərpasına və genişləndirilməsinə dəstək vermək, biomüxtəlifliyi qorumaq və iqlim dəyişikliyinin mənfi təsirlərinin azaldılması prosesində cəmiyyətin iştirakını artırmaqdır.

Sənəddə qeyd olunur ki, proqramda Gürcüstanın bütün ərazisində sentyabrın 15-i tarixinə qeydiyyatda olan bütün birinci sinif şagirdləri iştirak edəcəklər.

Proqram çərçivəsində:

Yerli özünüidarəetmə orqanlarının iştirakı ilə yaşayış məntəqələrində və onların ətraf ərazilərində yaşıllaşdırma tədbirlərinin həyata keçiriləcəyi bələdiyyə mülkiyyətində olan sahələr müəyyən ediləcək;

Ətraf mühit şəraiti, iqlim qurşağı və biomüxtəlifliyin qorunması prinsipləri nəzərə alınmaqla, əkiləcək fidanların növləri seçiləcək və əkin üçün optimal dövrlər müəyyən olunacaq;

Yerli özünüidarəetmə orqanları və təhsil müəssisələrinin iştirakı ilə 2026-cı il sentyabrın 15-nə olan məlumata əsasən qeydiyyatda olan bütün birinci sinif şagirdlərinə öz fidanlarını əkmək və onun böyüməsi və inkişafını müşahidə etmək imkanı veriləcək;

Cəmiyyətin məlumatlandırılması və ekoloji məsuliyyətin artırılması məqsədilə maarifləndirici kampaniyalar həyata keçiriləcək;

Yerli özünüidarəetmə orqanlarının iştirakı ilə əkilən fidanların vəziyyətinə nəzarət ediləcək və onlara sonrakı qulluq göstəriləcək.

Proqramın həyata keçirilməsində iştirak edən qurumların səlahiyyətlərinə gəlincə:

Ətraf Mühitin Mühafizəsi və Kənd Təsərrüfatı Nazirliyi fidanların alınması, logistika və onların müəyyən edilmiş ərazilərə çatdırılması, prosesin monitorinqi və maarifləndirmə kampaniyalarının həyata keçirilməsinə cavabdeh olacaq.

Təhsil, Elm və Gənclər Nazirliyi birinci sinif şagirdlərinin prosesə cəlb olunmasını və onların yaşıllaşdırma ərazilərinə təhlükəsiz daşınmasını təmin edəcək.

Regional İnkişaf Nazirliyi və bələdiyyələr yaşıllaşdırma üçün bələdiyyə mülkiyyətində olan əraziləri müəyyən edəcək, əkin prosesinin təşkilini və əkilən fidanlara sonrakı qulluq göstərilməsini təmin edəcəklər.

Proqramın həyata keçirilməsi üçün zəruri maliyyə vəsaitinin tapılmasını Ətraf Mühitin Mühafizəsi və Kənd Təsərrüfatı Nazirliyi Gürcüstanın “Ekoloji Məsuliyyət haqqında” Qanununun 14-cü maddəsində nəzərdə tutulan ekoloji proqram çərçivəsində təmin edəcək.