Fevralın 1-dən avtomobillərin təkrar texniki baxışdan keçirilməsi neçə lariyə başa gələcək?

Fevralın 1-dən avtomobillərin təkrar texniki baxışı ödənişli olur. 

InterPress.ge xəbər verir ki, artıq bununla bağlı hökumətin qərarı dərc olunub.

Dəyişiklik nəticəsində avtomobilin ilkin texniki baxışının dəyəri dəyişməz olaraq qalır. Təkrar yoxlamaya isə müəyyən xərc qoyulacaq. O cümlədən, yüngül avtomobillərin və taksilərin təkrar texniki baxışdan keçirilməsi 20 lari olacaq.

Daha dəqiq desək, müxtəlif kateqoriyalı avtomobillər üçün təkrar dövri texniki baxışların məbləği aşağıdakı kimi olacaq:

• Sərnişinlərin daşınması üçün nəzərdə tutulmuş 8-dən çox oturacağı olan (sürücü oturacağı istisna olmaqla) motorlu nəqliyyat vasitələri (mikroavtobuslar)- 30 lari;
• Yüklərin daşınması üçün nəzərdə tutulmuş ümumi çəkisi 3500 kq-dan çox olan avtomobillər (yük maşınları) - 30 lari;
• Ümumi çəkisi 3500 kq-dan çox olan qoşqular və yarımqoşqular - 20 lari;
• Təcili tibbi yardım maşınları - 20 lari;
• Taksi - 20 lari;
• Pikap - 20 lari;
• Kənd təsərrüfatı maşınları və traktorlar istisna olmaqla, yüklərin daşınması üçün nəzərdə tutulmuş ümumi çəkisi 3500 kq-dan çox olmayan və dörd təkərdən az olmayan motorlu nəqliyyat vasitələri - 20 lari;
• Sərnişinlərin daşınması üçün nəzərdə tutulmuş oturacaqların sayı 8-dən çox olmayan (sürücü oturacağı istisna olmaqla) və dörd təkərdən az olmayan avtonəqliyyat vasitələri - 20 lari.